മലയാളത്തിന്റെ മെഗാ സ്റ്റാർ മമ്മൂട്ടി നായകനായി എത്തുന്ന ഏറ്റവും പുതിയ ചിത്രമാണ് റോഷാക്ക്. ഇപ്പോൾ ഈ ചിത്രത്തിന്റെ ഫൈനൽ ഷെഡ്യൂൾ ഗൾഫിൽ പുരോഗമിക്കുകയാണ്. കെട്ട്യോളാണെന്റെ മാലാഖ എന്ന സൂപ്പർ ഹിറ്റ് ചിത്രമൊരുക്കി അരങ്ങേറ്റം കുറിച്ച നിസാം ബഷീർ സംവിധാനം ചെയ്യുന്ന ഈ ചിത്രം ഒരു സൈക്കോളജിക്കൽ ത്രില്ലറായാണ് ഒരുക്കുന്നതെന്ന് വാർത്തകൾ വന്നിരുന്നു. സെപ്റ്റംബർ അല്ലെങ്കിൽ ഒക്ടോബർ മാസത്തിലാണ് ഇതിന്റെ റിലീസ് നോക്കുന്നതെന്നും വാർത്തകൾ വരുന്നുണ്ട്. ഇപ്പോഴിതാ, ഈ ചിത്രത്തിൽ യുവ താരം ആസിഫ് അലി ഒരതിഥി വേഷം ചെയ്യുന്നുണ്ട് എന്ന റിപ്പോർട്ടുകളാണ് പുറത്തു വരുന്നത്. കഴിഞ്ഞ ദിവസം മമ്മൂട്ടിക്കും ഈ ചിത്രത്തിന്റെ അണിയറ പ്രവർത്തകർക്കുമൊപ്പമുള്ള തന്റെ ചിത്രം ആസിഫ് അലി പുറത്തു വിട്ടിരുന്നു. നിസാം ബഷീറിന്റെ ആദ്യ ചിത്രമായ കെട്ട്യോളാണെന്റെ മാലാഖയിൽ ആസിഫ് അലിയായിരുന്നു നായകനെന്നത് കൊണ്ട് തന്നെ, ഈ ചിത്രത്തിലും ആസിഫ് ഉണ്ടെന്ന വാർത്തയ്ക്കു വലിയ പ്രചാരമാണ് ലഭിച്ചു കൊണ്ടിരിക്കുന്നത്. ഇതിനു മുൻപും മമ്മൂട്ടിയും ആസിഫ് അലിയും ഒരുമിച്ചഭിനയിച്ചിട്ടുണ്ട്.
തന്റെ ഏറ്റവും പുതിയ നിർമ്മാണ ബാനറായ മമ്മൂട്ടി കമ്പനിയുടെ ബാനറിൽ മമ്മൂട്ടി തന്നെ നിർമ്മിക്കുന്ന രണ്ടാമത്തെ ചിത്രമാണെന്ന പ്രത്യേകതയും റോഷാക്കിനുണ്ട്. മമ്മൂട്ടിയെ കൂടാതെ ഷറഫുദ്ധീൻ, ജഗദീഷ്, ഗ്രേസ് ആന്റണി, ബിന്ദു പണിക്കർ, സഞ്ജു ശിവറാം, കോട്ടയം നസീർ തുടങ്ങി ഒരു വലിയ താരനിരതന്നെ ഈ ചിത്രത്തിൽ അണിനിരക്കുന്നുണ്ട്. സമീർ അബ്ദുൽ രചന നിർവഹിച്ചിരിക്കുന്ന ഈ ചിത്രം ഇതിനോടകം വലിയ പ്രേക്ഷക പ്രതീക്ഷയാണ് ഉണ്ടാക്കിയിരിക്കുന്നത്. നിമിഷ് രവി ഛായാഗ്രഹണം നിർവഹിക്കുന്ന ഈ ചിത്രത്തിന്റെ എഡിറ്റിംഗ് നിർവഹിക്കാൻ പോകുന്നത് കിരൺ ദാസ്, സംഗീതമൊരുക്കുന്നത് മിഥുൻ മുകുന്ദൻ എന്നിവരാണ്.
