പ്രശോഭ് വിജയനൊരുക്കിയ അന്വേഷണമെന്ന ചിത്രം മികച്ച വിജയം നേടി തീയേറ്ററുകളിൽ മുന്നേറുന്ന കാഴ്ചയാണ് കാണാൻ സാധിക്കുന്നത്. പ്രേക്ഷകരും നിരൂപകരും സിനിമാ മേഖലയിൽ നിന്നുള്ളവരുമെല്ലാം ഒരുപോലെ പ്രശംസ കൊണ്ട് മൂടുകയാണ് ഈ ചിത്രത്തെ. ജയസൂര്യ നായകനായി എത്തിയ ഈ ചിത്രത്തിന് ഇപ്പോൾ അഭിനന്ദനവുമായി എത്തിയിരിക്കുന്നത് പ്രശസ്ത നടി സനുഷ സന്തോഷാണ്. ചിത്രം കണ്ടു എന്നും ഒരുപാട് ഇഷ്ടമായി എന്നും സനുഷ പറയുന്നു. ജയസൂര്യ ഗംഭീരമായി എന്ന് പറഞ്ഞ സനുഷ, അദ്ദേഹത്തിന്റെ ഒരു രംഗത്തിലെ പ്രകടനം എടുത്തു പറയുന്നുമുണ്ട്. ആ രംഗം പ്രേക്ഷകരെ മുഴുവൻ കരയിച്ചു എന്നാണ് സനുഷ പറയുന്നത്. അതോടൊപ്പം ശ്രുതി രാമചന്ദ്രൻ, വിജയ് ബാബു, എന്നിവരേയും സംവിധായകൻ പ്രശോഭ് വിജയനേയും ഈ നടി പ്രശംസിക്കുന്നുണ്ട്. ശ്രുതി രാമചന്ദ്രൻ വളരെ മനോഹരമായി തന്റെ കഥാപാത്രം ചെയ്തു എന്നും അതുപോലെ ഫിലിപ്സ് ആൻഡ് മങ്കി പെൻ എന്ന ചിത്രത്തിന് ശേഷം തനിക്കു ഇഷ്ടപെട്ട വിജയ് ബാബുവിന്റെ കഥാപാത്രം ഈ ചിത്രത്തിലെ ആണെന്നും സനുഷ പറയുന്നു.
ഫ്രാൻസിസ് തോമസ് തിരക്കഥ രചിച്ചിരിക്കുന്നു ഈ ചിത്രത്തിന് സംഭാഷണം ഒരുക്കിയത് സലിൽ വി, രൺജിത് കമല ശങ്കർ എന്നിവർ ചേർന്നാണ്. ലെന, ലിയോണ ലിഷോയ് എന്നിവരും ഈ ചിത്രത്തിലെ പ്രകടനത്തിന് കയ്യടി നേടുന്നുണ്ട്. ഇ ഫോർ എന്റെർറ്റൈന്മെന്റ്സ്, എ വി എ പ്രൊഡക്ഷൻസ് എന്നിവയുടെ ബാനറിൽ സി വി സാരഥി, മുകേഷ് ആർ മെഹ്ത, എ വി അനൂപ് എന്നിവർ ചേർന്നാണ് ഈ ചിത്രം നിർമ്മിച്ചിരിക്കുന്നത്. സുജിത് വാസുദേവ് ക്യാമറ ചലിപ്പിച്ച ഈ ചിത്രത്തിന് സംഗീതമൊരുക്കിയത് ജേക്സ് ബിജോയും എഡിറ്റ് ചെയ്തിരിക്കുന്നത് അപ്പു ഭട്ടതിരിയുമാണ്.
