അങ്കമാലി ഡയറീസ് എന്ന തന്റെ ആദ്യ ചിത്രത്തിലൂടെ തന്നെ യുവ പ്രേക്ഷകരുടെ പ്രിയങ്കരനായി മാറിയ ആന്റണി വർഗീസ് പ്രധാന വേഷത്തിലെത്തുന്ന രണ്ടാമത്തെ ചിത്രമായ സ്വാതന്ത്ര്യം അർദ്ധരാത്രിയിൽ എന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ ഇന്ന് റിലീസ് ചെയ്തു. റിലീസ് ചെയ്ത നിമിഷം മുതൽ സോഷ്യൽ മീഡിയയിൽ ആവേശത്തിന്റെ തിരയിളക്കം സൃഷ്ടിക്കുകയാണ് ഈ ഫസ്റ്റ് ലുക്ക് പോസ്റ്റർ എന്ന് പറയാം. ഒരു മാസ്സ് ഫസ്റ്റ് ലുക്ക് പോസ്റ്റർ തന്നെയാണ് അണിയറ പ്രവർത്തകർ പുറത്തു വിട്ടിരിക്കുന്നത്. യുവ സൂപ്പർ താരം പ്രിത്വി രാജ് സുകുമാരൻ ആണ് തന്റെ ഒഫീഷ്യൽ ഫേസ്ബുക് പേജിലൂടെ ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തു വിട്ടത്. നവാഗതനായ ടിനു പാപ്പച്ചൻ സംവിധാനം ചെയ്ത ഈ ചിത്രം നിർമ്മിച്ചിരിക്കുന്നത് സംവിധായകനായ ബി ഉണ്ണികൃഷ്ണനും സൂര്യ സിനിമയുടെ ബാനറിൽ ബി സി ജോഷിയുമാണ്. സംവിധായകനായ ലിജോ ജോസ് പെല്ലിശ്ശേരി, നടൻ ചെമ്പൻ വിനോദ് എന്നിവരും ഈ ചിത്രത്തിന്റെ സഹ നിർമ്മാതാക്കളാണ്.
ബി ഉണ്ണികൃഷ്ണന്റെ ആർ ഡി ഇല്ല്യൂമിനേഷൻ ഈ ചിത്രം കേരളത്തിൽ വിതരണം ചെയ്യും .കഴിഞ്ഞ വർഷത്തെ ഹിറ്റുകളിൽ ഒന്നായ ബി ഉണ്ണികൃഷ്ണൻ- മോഹൻലാൽ ചിത്രം വില്ലനും ആർ ഡി ഇല്ല്യൂമിനേഷൻ ആണ് ഇവിടെ വിതരണം ചെയ്തത്. ദിലീപ് കുരിയൻ തിരക്കഥ രചിച്ചിരിക്കുന്നു ഈ ചിത്രം ഒരു ത്രില്ലർ ആയാണ് ഒരുക്കിയിരിക്കുന്നത് എന്നാണ് സൂചന. ഗിരീഷ് ഗംഗാധരൻ ദൃശ്യങ്ങൾ ഒരുക്കിയ ഈ ചിത്രം എഡിറ്റ് ചെയ്തിരിക്കുന്നത് ഷമീർ മുഹമ്മദ് ആണ്. ജേക്സ് ബിജോയ് ആണ് ഈ ചിത്രത്തിന് വേണ്ടി ഗാനങ്ങൾ ഒരുക്കിയിരിക്കുന്നത്. അതേ സമയം പശ്ചാത്തല സംഗീതം ഒരുക്കിയിരിക്കുന്നത് ദീപക് അലക്സാണ്ടർ ആണ്. ഈ ചിത്രത്തിന്റെ ആദ്യ മോഷൻ പോസ്റ്റർ മാസങ്ങൾക്കു മുൻപേ റിലീസ് ചെയ്യുകയും ഗംഭീര സ്വീകരണം പ്രേക്ഷകരുടെ ഇടയിൽ നിന്ന് നേടുകയും ചെയ്തിരുന്നു.
