ആൻറണി വർഗ്ഗീസിനെ നായകനാക്കി ടിനു പാപ്പച്ചൻ സംവിധാനം ചെയ്ത ചിത്രം സ്വാതന്ത്ര്യം അർദ്ധരാത്രിയിൽ പ്രേക്ഷകശ്രദ്ധ പിടിച്ചുപറ്റി മുന്നേറുകയാണ്. ഈസ്റ്റർ റിലീസായി പുറത്തിറങ്ങിയ ചിത്രം ഒപ്പം പുറത്തിറങ്ങിയ മറ്റ് ചിത്രങ്ങളെയെല്ലാം കടത്തിവെട്ടി വമ്പൻ കളക്ഷനാണ് നേടിയത്. യുവാക്കൾ വലിയ രീതിയിൽ തന്നെ ഏറ്റെടുത്ത ചിത്രം ആദ്യദിനം മുതൽ വന്ന മികച്ച പ്രതികരണം കൂടിയായപ്പോൾ വമ്പൻ കളക്ഷനിലേക്ക് കുതിക്കുകയായിരുന്നു. ചിത്രം ആദ്യവാരം 5 കോടിയായിരുന്നു കളക്ഷൻ നേടിയത്, ഇപ്പോൾ പുറത്തുവരുന്ന വാർത്തകൾ അനുസരിച്ച് ചിത്രം ഇതിനോടകം 15 കോടി കളക്ഷൻ സ്വന്തമാക്കി കഴിഞ്ഞു. ചെറിയ ബജറ്റിൽ ഒരുക്കിയ കൊച്ചു ചിത്രം വമ്പൻ വിജയമായതിന്റെ ആഹ്ലാദത്തിലാണ് ചിത്രത്തിന്റെ അണിയറ പ്രവർത്തകരും. ചിത്രം മറ്റു രാജ്യങ്ങളിൽ കൂടി റിലീസിന് എത്തുന്നതോടു കൂടി ചിത്രത്തിന്റെ കളക്ഷൻ വൻതോതിൽ ഉയരുമെന്നാണ് കരുതുന്നത്. അതുകൂടി സംഭവിക്കുന്നതോടെ ഈ വർഷത്തെ ഏറ്റവും വലിയ ഹിറ്റായി ചിത്രം മാറാനുള്ള സാധ്യത വർധിച്ചിരിക്കുകയാണ്.
ലിജോ ജോസ് പെല്ലിശ്ശേരിയുടെ ശിഷ്യൻ ടിനു പാപ്പച്ചൻ ആദ്യമായി സംവിധാനം ചെയ്ത ചിത്രം മലയാളത്തിൽ ഇന്നേവരെ കാണാത്ത ആഖ്യാന മികവു കൂടി ദൃശ്യമാക്കിയ ചിത്രമായിരുന്നു. ദിലീപ് കുര്യൻ രചന നിർവഹിച്ച മികച്ച തിരക്കഥ ചിത്രത്തിൻറെ നട്ടെല്ലായി മാറി. ചിത്രത്തിലെ കഥാപാത്രങ്ങളെ അവതരിപ്പിച്ച നടീനടന്മാർ എല്ലാവരും അവരുടെ പ്രകടനത്താൽ കയ്യടി നേടുകയുണ്ടായി. ചിത്രത്തിലൂടെ മലയാളത്തിൽ വീണ്ടും നായക വേഷത്തിൽ തിരിച്ചെത്തിയ ആന്റണി വർഗീസ് തന്റെ രണ്ടാം ചിത്രവും വിജയമാക്കികൊണ്ട് തന്റെ നായകപദവി വീണ്ടും ഉറപ്പിക്കുകയായിരുന്നു. ചിത്രത്തിലൂടെ വിനായകൻ ചെമ്പൻ വിനോദ് എന്നിവർ തങ്ങളുടെ സ്വതസിദ്ധമായ ശൈലിയിൽ കയ്യടി നേടി. ബി. സി. ജോഷി നിർമ്മിച്ച ചിത്രം വിഷുക്കാലത്തും വളരെ മികച്ച പ്രകടനം നടത്തിയ മുന്നേറുകയാണ്.
