തമിഴകത്തിന്റെ സൂപ്പർ താരം തല അജിത്തിനെ നായകനാക്കി സൂപ്പർ ഹിറ്റ് സംവിധായകൻ എച്ച് വിനോദ് ഒരുക്കിയ ഏറ്റവും പുതിയ ചിത്രത്തിന്റെ ടൈറ്റിലും ഫസ്റ്റ് ലുക്കും ഇന്ന് പുറത്തു വിട്ടു. തുനിവ് എന്നാണ് ഈ ചിത്രത്തിന് നൽകിയിരിക്കുന്ന പേര്, ടൈറ്റിലിനൊപ്പം തന്നെ ഗംഭീര ലുക്കിൽ, കയ്യിലൊരു തോക്കും പിടിച്ചിരിക്കുന്ന തല അജിത്തിന്റെ സ്റ്റൈലിഷ് പോസ്റ്ററും അണിയറ പ്രവർത്തകർ പുറത്ത് വിട്ടിട്ടുണ്ട്. നേർക്കൊണ്ട പാർവൈ, വലിമയ് എന്നിവക്ക് ശേഷം അജിത്- എച്ച് വിനോദ് ടീം ഒന്നിക്കുന്ന ചിത്രമാണ് തുനിവ്. ഇതൊരു ഹെയ്‌സ്റ്റ് ത്രില്ലർ ആയാണ് ഒരുക്കുന്നതെന്ന് വാർത്തകൾ വന്നിരുന്നു. മലയാളത്തിന്റെ ലേഡി സൂപ്പർസ്റ്റാർ മഞ്ജു വാര്യരാണ് ഈ ചിത്രത്തിലെ നായികാ വേഷം ചെയ്യുന്നതെന്ന പ്രത്യേകതയുമുണ്ട്. നോ ഗട്ട്സ് നോ ഗ്ലോറി എന്നാണ് ഈ ചിത്രത്തിന്റെ ടൈറ്റിലിന് നൽകിയിരിക്കുന്ന ടാഗ് ലൈൻ.
ഒരു ഗംഭീര മാസ്സ് ആക്ഷൻ ത്രില്ലറായിരിക്കും ഈ ചിത്രമെന്ന ഫീലും ഇതിന്റെ ഫസ്റ്റ് ലുക്ക് പോസ്റ്റർ നമ്മുക്ക് തരുന്നുണ്ട്. ഏതായാലും മുഴുവനായി നരച്ച താടിയും മുടിയുമായി ഗംഭീര ലുക്കിലാണ് അജിത് ഈ ചിത്രത്തിൽ പ്രത്യക്ഷപ്പെടുന്നത്. ബേ വ്യൂ പ്രോജെക്ടസിന്റെ ബാനറിൽ ബോളിവുഡ് നിർമ്മാതാവായ ബോണി കപൂർ നിർമ്മിച്ചിരിക്കുന്ന ഈ ചിത്രത്തിന്റെ സഹനിർമ്മാതാക്കളായി സീ സ്റ്റുഡിയോയും എത്തുന്നുണ്ട്. നീരവ് ഷാ ക്യാമറ ചലിപ്പിക്കുന്ന ഈ ചിത്രത്തിന് സംഗീതമൊരുക്കുന്നത് ജിബ്രാൻ ആണ്. വിജയ് വേലുക്കുട്ടി ആണ് ഈ ചിത്രം എഡിറ്റ് ചെയ്യുന്നത്. നേർക്കൊണ്ട പാർവൈ എന്ന ബ്ലോക്ക്ബസ്റ്റർ നൽകിയ വിനോദ്-അജിത് കൂട്ടുകെട്ടിലെ വലിമയ് പ്രതീക്ഷിച്ച വിജയം നേടിയില്ല. അത്കൊണ്ട് തന്നെ തുനിവ് എന്ന ചിത്രം ഈ കൂട്ടുകെട്ടിന്റെ വമ്പൻ തിരിച്ചു വരവായി മാറുമോ എന്നറിയാനുള്ള ആകാംഷയിലാണ് ആരാധകർ.
