മലയാളി പ്രേക്ഷകർ ഇരുകയ്യും നീട്ടി സ്വീകരിച്ച ചിത്രമാണ് സക്കറിയ ഒരുക്കിയ സുഡാനി ഫ്രം നൈജീരിയ. ഈ ചിത്രത്തിലൂടെ ഒട്ടേറെ പുതിയ അഭിനേതാക്കളും മലയാള സിനിമാ പ്രേമികളുടെ മനസ്സിലിടം പിടിച്ചു. അങ്ങനെയൊരു കലാകാരനാണ് ഉണ്ണി നായർ. വാളാഞ്ചേരിക്കാരനായ ഉണ്ണി നായർ കളരിയും യോഗയും നാൽക്കാലി കച്ചവടവുമൊക്കെയായി നടക്കുമ്പോഴാണ് സംവിധായകൻ സക്കറിയ അദ്ദേഹത്തെ കണ്ടെത്തുന്നത്. ഒരു ഹൃസ്വ ചിത്രം വഴി തന്റെ അഭിനയ ജീവിതം തുടങ്ങിയ ഉണ്ണി നായർ ഇന്ന് മലയാള സിനിമാ പ്രേക്ഷകർക്ക് സുപരിചിതൻ. ഉസ്താദ് ഹോട്ടൽ എന്ന അൻവർ റഷീദ് ചിത്രത്തിലൂടെ സിനിമയിലെത്തിയ ഉണ്ണി നായരുടെ ഇഷ്ട താരം മെഗാ സ്റ്റാർ മമ്മൂട്ടിയാണ്.
ഒരു സിനിമയുടെ സെറ്റിൽ വച്ച് മമ്മൂട്ടിയെ നേരിൽ കണ്ടെങ്കിലും ഉണ്ണി നായർക്ക് അദ്ദേഹത്തിന്റെ അടുത്തു പോയി സംസാരിക്കാൻ മടിയായിരുന്നു. താൻ വെറുമൊരു തുപ്പലം കൊത്തി പരൽ ആണെന്നും അദ്ദേഹം വലിയൊരു താരമല്ലേ എന്നൊക്കെയാണ് മമ്മൂട്ടിയോട് സംസാരിക്കാതിരുന്നതിനു ഉണ്ണി നായർ പറയുന്ന രസകരമായ ന്യായങ്ങൾ. നല്ല ലക്ഷണമൊത്ത മനുഷ്യനാണ് മമ്മൂട്ടി എന്നും എല്ലാവരോടും അങ്ങനെയുള്ള ആളുകൾ സംസാരിയ്ക്കില്ല എന്നും ഉണ്ണി നായർ പറയുന്നു. അങ്ങനെയാണെങ്കിലും അവരുടെ മനസ്സ് ക്ലിയറായിരിക്കും എന്നാണ് ഉണ്ണി നായർ പറയുന്നത്. മമ്മൂട്ടിയോടൊപ്പം ഒരു സിനിമയിൽ അഭിനയിച്ചിട്ടുണ്ടെങ്കിലും ഉണ്ണി നായർ ഇതുവരെ അദ്ദേഹത്തിന്റെ മുന്നിൽ പോവുകയോ സംസാരിക്കുകയോ ചെയ്തിട്ടില്ല. മമ്മൂട്ടി നായകനായ ബാല്യകാല സഖി എന്ന സിനിമയിൽ ആയിരുന്നു ഉണ്ണി നായർ അഭിനയിച്ചത്. മമ്മൂട്ടിയുടെ വലിയ ആരാധകനാണ് താനെന്നും അദ്ദേഹത്തിന്റെ ഒരു സിനിമ പോലും ഒഴിവാക്കാറില്ലായെന്നും ഉണ്ണി നായർ വെളിപ്പെടുത്തുന്നു.
