ഏറെ നാളുകൾക്ക് ശേഷം മലയാളത്തിൽ എത്തിയ ആനചിത്രമാണ് ‘ആന അലറലോടലറൽ’. മുൻപ് ആനയെ കേന്ദ്രകഥാപാത്രമാക്കി നിരവധി ചിത്രങ്ങൾ പുറത്തിറങ്ങിയിട്ടുണ്ടെങ്കിലും അതിൽ അഭിനയിച്ച ആനകൾക്കൊന്നും ലഭിക്കാത്തത്ര ആരാധകരാണ് ‘ആന അലറലോടലറലൽ’ എന്ന ചിത്രത്തിലെ ശേഖരൻകുട്ടിയെ അവതരിപ്പിച്ച നന്തിലത്ത് അർജുനന് ലഭിക്കുന്നത്. ട്രെയിലറിലൂടെയും പാട്ടുകളിലൂടെയും മറ്റും ചുരുങ്ങിയ സമയം കൊണ്ടുതന്നെ നന്തിലത്ത് അർജുനൻ സിനിമാപ്രേമികളുടെ മനം കവർന്നിരുന്നു. ചിത്രം പുറത്തിറങ്ങിയതോടുകൂടി കൂടുതൽ ആവേശത്തിലാണ് ആരാധകർ.
വൈകുണ്ഠപുരം എന്ന ഗ്രാമത്തിലെ ശേഖരന്‍ കുട്ടിയുടെ 15 വര്‍ഷത്തെ ജീവിതവും പലരുമായുള്ള ആത്മബന്ധവും ചിത്രത്തിൽ ഭംഗിയായി അവതരിപ്പിക്കാൻ നന്തിലത്ത് അർജുനന് കഴിഞ്ഞിട്ടുണ്ട്. ഓരോ ഷോട്ടിലും വളരെ കൃത്യതയോടെയാണ് നന്തിലത്ത് അര്‍ജുനന്‍ അഭിനയിച്ചതെന്ന് മുൻപ് അണിയറപ്രവർത്തകർ പറഞ്ഞിരുന്നു. ചെവിയുടെയും തുമ്പിക്കൈയുടെയും അനക്കം വരെ വളരെ കൃത്യമായി ചെയ്‌ത്‌ അർജുനൻ തങ്ങളെ അത്ഭുതപ്പെടുത്തിയെന്നും അവർ വ്യക്തമാക്കിയിരുന്നു.
അനു സിത്താരയാണ് ‘ആന അലറലോടലറലി’ൽ വിനീത് ശ്രീനിവാസന്റെ നായികയായി എത്തുന്നത്. സുരാജ് വെഞ്ഞാറമ്മൂട്, ഇന്നസെന്റ്, വിജയരാഘവന്‍, മാമുക്കോയ, ബിജുക്കുട്ടൻ, ഹരീഷ് കണാരന്‍, ധര്‍മജന്‍ ബോള്‍ഗാട്ടി, തെസ്‌നി ഖാൻ, പ്രിയങ്ക, മഞ്ജുവാണി തുടങ്ങിയവരാണ് പ്രധാനകഥാപാത്രങ്ങളെ അവതരിപ്പിക്കുന്നത്. വിനീത് ശ്രീനിവാസനും മനുമഞ്ജിത്തും വരികള്‍ എഴുതിയ ചിത്രത്തിലെ ഗാനങ്ങള്‍ക്ക് ഈണമിട്ടത് ഷാന്‍ റഹ്മാനാണ്. പോയട്രി ഫിലിം ഹൗസിന്റെ ബാനറില്‍ സിബി തോട്ടുപുറം, നേവീസ് സേവ്യര്‍ എന്നിവരാണ് ചിത്രം നിര്‍മിച്ചിരിക്കുന്നത്.
