ദുല്‍ഖര്‍ സല്‍മാന്‍ നായകനായ പുതിയ ചിത്രം സോളോ കഴിഞ്ഞ ദിവസം തിയേറ്ററുകളില്‍ എത്തി. വമ്പന്‍ സ്വീകരണമാണ് ആദ്യ ദിനം തന്നെ ആരാധകര്‍ സോളോയ്ക്ക് നല്‍കിയത്. പുലര്‍ച്ചെ മുതല്‍ ചിത്രത്തിന്‍റെ ടിക്കറ്റിനായി തിയേറ്ററുകളില്‍ ക്യൂ ഉണ്ടായിരുന്നു.
മള്‍ടിപ്ലെക്സുകളിലും മികച്ച കലക്ഷനാണ് ഇന്നലെ ലഭിച്ചത്. സോളോ ആദ്യ ദിനം കേരളത്തില്‍ നിന്നും നേടിയ ഒഫീഷ്യല്‍ കലക്ഷന്‍ ഇപ്പോള്‍ ലഭ്യമായിട്ടില്ല. സോളോ ആദ്യ ദിന റെക്കോര്‍ഡുകള്‍ തകര്‍ക്കുമോ എന്നാണ് ആരാധകര്‍ ഉറ്റുനോക്കുന്നത്.
225 സ്ക്രീനുകളിലാണ് കേരളത്തില്‍ മാത്രം സോളോ റിലീസ് ചെയ്തത്. ദുല്‍ഖറിന്‍റെ സ്റ്റാര്‍ പവര്‍ വ്യക്തമാക്കുന്നതായിരുന്നു തിയേറ്ററുകളിലെ തിരക്ക്.
വരും ദിനങ്ങളിലും ഈ തിരക്ക് തുടരും എന്നാണ് ചിത്രത്തിന്‍റെ അണിയറ പ്രവര്‍ത്തകരുടെ പ്രതീക്ഷകള്‍.
ബോളിവുഡ് സംവിധായകനായ ബിജോയ് നമ്പ്യാര്‍ ആണ് സോളോ തിരക്കഥ എഴുതി സംവിധാനം ചെയ്തിരിക്കുന്നത്. മലയാളി കൂടിയായ ബിജോയ് നമ്പ്യാരുടെ ആദ്യ മലയാള സിനിമ കൂടിയാണ് സോളോ.
