മലയാളത്തിന്റെ യുവ താരം ദുൽഖർ സൽമാൻ നായകനായി എത്തിയ കുറുപ്പ് ഇന്നലെയാണ് ലോകം മുഴുവൻ റിലീസ് ചെയ്തത്. ദുൽഖർ സൽമാന്റെ കരിയറിലെ തന്നെ ഏറ്റവും വലിയ ചിത്രമായ കുറുപ്പ്, ദുൽഖർ അരങ്ങേറ്റം കുറിച്ച സെക്കന്റ് ഷോ എന്ന ചിത്രം ഒരുക്കിയ ശ്രീനാഥ് രാജേന്ദ്രൻ ആണ്. കേരളത്തിൽ 500 ഇൽ അധികം സ്ക്രീനിൽ പ്രദർശിപ്പിച്ച ഈ ചിത്രം 2300 ഷോകൾ ആണ് കളിച്ചത്. ആദ്യ ദിനം കേരളത്തിൽ നിന്ന് മാത്രം 4.5 കോടിക്കു മുകളിൽ നേടിയ കുറുപ്പ് ആഗോള കളക്ഷൻ ആയി നേടിയത് 13-14 കോടിയോളം ആണ്. ഒടിയൻ, ലുസിഫെർ എന്നീ മോഹൻലാൽ ചിത്രങ്ങൾ കഴിഞ്ഞാൽ ഏറ്റവും മികച്ച ഓപ്പണിങ് ആഗോള തലത്തിൽ നേടിയ ചിത്രമാണ് കുറുപ്പ്. പത്തു കോടിക്കു മുകളിൽ ആദ്യ ദിനം നേടിയ മൂന്നാമത്തെ മാത്രം മലയാള ചിത്രവുമാണ് കുറുപ്പ്.
ഗൾഫിൽ നിന്ന് 7 കോടിക്കു മുകളിൽ ആണ് കുറുപ്പ് നേടിയത്. ഈ വർഷം ഏറ്റവും മികച്ച ഓപ്പണിങ് ഗൾഫിൽ നേടിയ ഇന്ത്യൻ ചിത്രം കൂടിയാണ് കുറുപ്പ്.124 ലൊക്കേഷനിൽ ആണ് ഗൾഫിൽ കുറുപ്പ് എത്തിയത്. കേരളത്തിലെ കുപ്രസിദ്ധ പിടികിട്ടാപ്പുള്ളി ആയ സുകുമാര കുറുപ്പിന്റെ ജീവതകഥ പറയുന്ന ഈ ചിത്രം രചിച്ചിരിക്കുന്നത് കെ എസ് അരവിന്ദ്, ഡാനിയൽ സായൂജ് നായർ എന്നിവർ ചേർന്നാണ്. ഇന്ദ്രജിത് സുകുമാരൻ, ഷൈൻ ടോം ചാക്കോ, ശോഭിത, സുരഭി ലക്ഷ്മി, വിജയ രാഘവൻ, ഭരത്, ശിവജിത് പദ്മനാഭൻ, മായാ മേനോൻ, വിജയകുമാർ, സൈജു കുറുപ്പ്, സണ്ണി വെയ്ൻ, ആനന്ദ് ബാൽ, ഹാരിഷ് കണാരൻ, എം ആർ ഗോപകുമാർ, പി ബാലചന്ദ്രൻ, ബിബിൻ പെരുമ്പിള്ളിക്കുന്നേൽ, കൃഷ് എസ് കുമാർ, സാദിഖ് മുഹമ്മദ്, സുധീഷ് തുടങ്ങി ഒട്ടേറെ താരങ്ങൾ ഈ ചിത്രത്തിൽ അഭിനയിച്ചിട്ടുണ്ട്.
