ജനപ്രിയ നായകൻ ദിലീപിനെ നായകനാക്കി പ്രശസ്ത സംവിധായകൻ ബി ഉണ്ണികൃഷ്ണൻ രചിച്ചു സംവിധാനം ചെയ്ത ചിത്രമാണ് കോടതി സമക്ഷം ബാലൻ വക്കീൽ. അടുത്ത മാസം ഇരുപത്തിയൊന്നിന് റിലീസ് ചെയ്യാൻ പോകുന്ന ഈ ചിത്രത്തിന്റെ ഒരു ടീസർ ഇതിനോടകം പുറത്തു വരികയും വമ്പൻ ഹിറ്റായി മാറുകയും ചെയ്തിരുന്നു. ഇപ്പോഴിതാ ഈ ചിത്രത്തിന്റെ ട്രൈലെർ ഇന്ന് റിലീസ് ചെയ്തിരിക്കുകയാണ്. അക്ഷരാർത്ഥത്തിൽ കിടിലൻ എന്ന് വിശേഷിപ്പിക്കാവുന്ന ഒരു ട്രൈലെർ ആണ് അണിയറ പ്രവർത്തകർ പുറത്തു വിട്ടിരിക്കുന്നത്. ബാലകൃഷ്ണൻ അഥവാ ബാലൻ എന്ന് പേരുള്ള വിക്കനായ ഒരു വക്കീൽ ആയാണ് ദിലീപ് ഈ ചിത്രത്തിൽ അഭിനയിച്ചിരിക്കുന്നത്.
ആരാധകരെ ആവേശം കൊള്ളിക്കുന്ന തകർപ്പൻ പ്രകടനമാണ് ജനപ്രിയ നായകൻ കാഴ്ച വെച്ചിരിക്കുന്നത് എന്ന സൂചനയാണ് ഈ ട്രൈലെർ നമ്മുക്ക് നൽകുന്നത്. കോമെഡിയും ആവേശവും സസ്‌പെൻസും എല്ലാം നിറഞ്ഞ ഒരു കമ്പ്ലീറ്റ് എന്റെർറ്റൈനെർ ആയാണ് ബി ഉണ്ണികൃഷ്ണൻ ഈ ചിത്രം ഒരുക്കിയിരിക്കുന്നതെന്ന് ട്രൈലെർ നമ്മളോട് പറയുന്നു. മമത മോഹൻദാസും പ്രിയ ആനന്ദുമാണ് ഈ ചിത്രത്തിലെ നായികാ വേഷങ്ങൾ ചെയ്തിരിക്കുന്നത്. പ്രശസ്ത ബോളിവുഡ് സിനിമാ നിർമ്മാണ കമ്പനിയായ വയാകോം 18 ആദ്യമായി മലയാളത്തിൽ നിർമ്മിച്ച ചിത്രമാണ് കോടതി സമക്ഷം ബാലൻ വക്കീൽ. സൈജു കുറുപ്പ്, രഞ്ജി പണിക്കർ , അജു വർഗീസ് എന്നിവരും അഭിനയിക്കുന്ന ഈ ചിത്രത്തിന് ദൃശ്യങ്ങൾ ഒരുക്കിയത് അഖിൽ ജോര്ജും എഡിറ്റ് ചെയ്തിരിക്കുന്നത് ഷമീർ മുഹമ്മദും ആണ്. ഗോപി സുന്ദർ, രാഹുൽ രാജ് എന്നിവർ ചേർന്ന് സംഗീതം ഒരുക്കിയ ഈ ചിത്രത്തിലെ സംഘട്ടനം ഒരുക്കിയത് മാഫിയ ശശി, റാം, ലക്ഷ്മൺ, സ്റ്റണ്ട് സിൽവ, സുപ്രീം സുന്ദർ എന്നിവർ ചേർന്നാണ്.
