പ്രശസ്ത സംവിധായകൻ എ ആർ മുരുഗദോസ് ഒരുക്കിയ പുതിയ ചിത്രമാണ് ദർബാർ. സൂപ്പർ സ്റ്റാർ രജനികാന്ത് നായകനായി എത്തുന്ന ഈ ചിത്രത്തിൽ ലേഡി സൂപ്പർ സ്റ്റാർ നയൻതാര ആണ് നായികാ വേഷം ചെയ്തിരിക്കുന്നത്. അടുത്ത മാസം പൊങ്കൽ റിലീസ് ആയാണ് ഈ ചിത്രം റിലീസ് ചെയ്യാൻ പോകുന്നത്. അനിരുദ്ധ് രവിചന്ദർ സംഗീത സംവിധാനം നിർവഹിച്ച ഈ ചിത്രത്തിന്റെ ഓഡിയോ ലോഞ്ച് കഴിഞ്ഞ ദിവസം നടന്നിരുന്നു. അനിരുദ്ധ് ഈ ചിത്രത്തിന് വേണ്ടി ഒരുക്കിയ ഗാനങ്ങൾ ഇപ്പോഴേ സൂപ്പർ ഹിറ്റായി കഴിഞ്ഞു. അതോടൊപ്പം ആ ഓഡിയോ ലോഞ്ച് ചടങ്ങിൽ വെച്ച് എ ആർ മുരുഗദോസ് പറഞ്ഞ ഒരു മറുപടിയും വമ്പൻ ഹിറ്റാണ്. ദളപതി വിജയ്, തല അജിത് അതുപോലെ ഇപ്പോൾ തലൈവർ രജനികാന്ത് എന്നിവരെ വെച്ച് ചിത്രങ്ങൾ സംവിധാനം ചെയ്തിട്ടുള്ള എ ആർ മുരുഗദോസിനോട് അവതാരക ചോദിച്ചത് ദളപതി, തല, തലൈവർ എന്നിവർ തമ്മിലുള്ള ഒരു സാമ്യം എന്തെന്നാണ്.
അതിനു മറുപടി ആയി എ ആർ മുരുഗദോസ് പറഞ്ഞത് തലൈവർ വേറെ ലെവൽ ആണെന്നും അദ്ദേഹത്തെ ആരുമായും താരതമ്യപ്പെടുത്താൻ പറ്റില്ല എന്നുമാണ്. തലൈവരോട് മത്സരിക്കാൻ തലൈവർക്കു മാത്രമേ സാധിക്കു എന്നും അദ്ദേഹം എല്ലാവരിൽ നിന്നും വേറിട്ട് നിൽക്കുന്ന ഒരു പ്രതിഭാസം ആണെന്നും ഈ സംവിധായകൻ പറയുന്നു. അജിത്തിനെ നായകനാക്കി ദീന എന്ന ചിത്രം ഒരുക്കിയിട്ടുള്ള എ ആർ മുരുഗദോസ് വിജയ്‌യെ നായകനാക്കി ഒരുക്കിയ ചിത്രങ്ങൾ ആണ് തുപ്പാക്കി, കത്തി, സർക്കാർ എന്നിവ. എ ആർ മുരുഗദോസ് സംവിധാനം ചെയ്യാൻ പോകുന്ന അടുത്ത ചിത്രത്തിലെ നായകൻ തല അജിത് ആണെന്ന് സ്ഥിതീകരിക്കാത്ത വാർത്തകൾ ഉണ്ട്.
