കംപ്ലീറ്റ് ആക്ടർ മോഹൻലാലിനെ നായകനാക്കി വൈശാഖ് ഒരുക്കിയ ഏറ്റവും പുതിയ ചിത്രമായ മോൺസ്റ്റർ ഇപ്പോൾ പ്രദർശനം തുടരുകയാണ്. ഉദയ കൃഷ്ണ രചിച്ച ഈ ചിത്രം ഒരു ഇൻവെസ്റ്റിഗേഷൻ ത്രില്ലർ ആയാണ് ഒരുക്കിയിരിക്കുന്നത്. പ്രമേയത്തിന്റെ പ്രസക്തി, മേക്കിങ് സ്റ്റൈൽ എന്നിവ കൊണ്ട് മികച്ച പ്രേക്ഷക പ്രതികരണം നേടുന്ന ഈ ചിത്രത്തിൻറെ ആദ്യ വീക്കെൻഡ് ആഗോള കളക്ഷൻ റിപ്പോർട്ട് ഇപ്പോൾ പുറത്ത് വന്നിരിക്കുകയാണ്. ആദ്യ 3 ദിവസം കൊണ്ട് 5 കോടിക്ക് മുകളിലാണ് ഈ ചിത്രം നേടിയ കളക്ഷൻ എന്ന് ട്രേഡ് അനലിസ്റ്റുകൾ റിപ്പോർട്ട് ചെയ്യുന്നു. കേരളത്തിൽ നിന്ന് 4 കോടിയോളം നേടിയ ഈ ചിത്രം വിദേശത്ത് നിന്ന് 70 ലക്ഷത്തോളം ആണ് ഗ്രോസ് നേടിയത്. റെസ്റ്റ് ഓഫ് ഇന്ത്യ മാർക്കറ്റിൽ നിന്ന് 30 ലക്ഷത്തിന് മുകളിലും ഈ ചിത്രം നേടി.
വളരെ കുറഞ്ഞ ബഡ്ജറ്റിൽ കോവിഡ്‌ നിയന്ത്രണങ്ങൾക്ക് ഇടയിൽ പൂർത്തിയാക്കിയ ചിത്രം കൂടിയാണ് മോൺസ്റ്റർ. ചെറിയ കാൻവാസിൽ ഒരുക്കിയ ഈ ത്രില്ലർ ചിത്രം സമീപകാലത്ത് വന്ന ഏറ്റവും ചെറിയ, ഹൈപ്പ് കുറഞ്ഞ മോഹൻലാൽ ചിത്രവുമാണ്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് ഈ ചിത്രം നിർമ്മിച്ചിരിക്കുന്നത്. മോഹൻലാലിനൊപ്പം ജോണി ആന്റണി, കോട്ടയം രമേശ്, സുദേവ് നായർ, ഹണി റോസ്, ഗണേഷ് കുമാർ, സിദ്ദിഖ്, ലക്ഷ്മി മഞ്ചു, ലെന, ഇടവേള ബാബു തുടങ്ങി ഒരുപിടി പ്രശസ്ത താരങ്ങൾ അഭിനയിച്ച ഈ ചിത്രത്തിന് സംഗീതമൊരുക്കിയത് ദീപക് ദേവ്, ക്യാമറ ചലിപ്പിച്ചത് സതീഷ് കുറുപ്പ്, എഡിറ്റ് ചെയ്തത് ഷമീർ മുഹമ്മദ് എന്നിവരാണ്.
