നടനവിസ്‌മയം മോഹൻലാലിന്റെ മകൻ പ്രണവ് മോഹൻലാൽ ആദ്യമായി നായകനാകുന്ന ‘ആദി’ യുടെ പുതിയ ടീസർ പുറത്തിറങ്ങി. കടൽത്തീരത്തുകൂടി നടന്നുപോകുന്ന പ്രണവിനെയാണ് ടീസറിൽ കാണിച്ചിരിക്കുന്നത്. ജീത്തു ജോസഫാണ് ചിത്രത്തിന്റെ സംവിധാനം. ജീത്തു ജോസഫ് സംവിധാനം ചെയ്യുന്ന 9–ാമത്തെ ചിത്രമാണ് ഇത്. 8 ചിത്രങ്ങൾ സംവിധാനം ചെയ്തപ്പോഴും ഇല്ലാത്ത ടെൻഷനാണ് തനിക്ക് ‘ആദി’ ചെയ്യുമ്പോഴെന്നും ജീത്തു ജോസഫ് മുൻപ് വ്യക്തമാക്കിയിരുന്നു. ചില കള്ളങ്ങള്‍ മാരകമായേക്കുമെന്നതാണ് ചിത്രത്തിന്റെ ടാഗ്‌ലൈന്‍.
ലെന, അനുശ്രീ, അദിതി രവി എന്നിവരാണ് ചിത്രത്തിലെ പ്രധാനപ്പെട്ട മൂന്ന് സ്ത്രീകഥാപാത്രങ്ങളെ അവതരിപ്പിക്കുന്നത്. സിദ്ദിഖ്, ഷിജു വിൽസൺ, ഷറഫുദ്ദീൻ, നോബി എന്നിവരും മുഖ്യവേഷത്തിൽ എത്തുന്നു. മേജര്‍രവിയുടെ പുനര്‍ജനി എന്ന ചിത്രത്തിലൂടെ മികച്ച ബാലതാരത്തിനുള്ള കേരള സംസ്ഥാന ചലച്ചിത്രപുരസ്‌കാരം സ്വന്തമാക്കിയ താരമാണ് പ്രണവ്. കൂടാതെ ‘സാഗര്‍ ഏലിയാസ് ജാക്കി’ എന്ന മോഹന്‍ലാല്‍ ചിത്രത്തിലെ രെു ഗാനത്തിലും ചെറിയ വേഷത്തിൽ പ്രണവ് മോഹൻലാൽ എത്തിയിരുന്നു. കൂടാതെ രണ്ട് ചിത്രങ്ങളിൽ സഹസംവിധായകനായും പ്രണവ് പ്രവർത്തിച്ചിട്ടുണ്ട്. സതീഷ് കുറുപ്പാണ് ആദിയുടെ ഛായാഗ്രഹണം നിർവഹിക്കുന്നത്. സംഗീതം അനിൽ ജോൺസൺ. ആന്റണി പെരുമ്പാവൂരാണ് ആശീർവാദ് സിനിമാസിനു വേണ്ടി ചിത്രം നിർമിക്കുന്നത്.
