തെലുങ്ക് സിനിമ പ്രേമികൾ ഏറെ കാത്തിരിക്കുന്ന ആക്ഷൻ ത്രില്ലർ ചിത്രങ്ങളിൽ ഒന്നാണ് ഹണ്ട്. സുധീർ ബാബു, ശ്രീകാന്ത്, ഭരത് എന്നിവർ പ്രധാന വേഷം ചെയ്യുന്ന ഈ ചിത്രത്തിന്റെ ടീസർ മികച്ച പ്രേക്ഷക പ്രതികരണമാണ് നേടിയത്. ഇപ്പോഴിതാ ഈ ചിത്രത്തിലെ ഒരു ഗാനത്തിന്റെ വീഡിയോ റിലീസ് ചെയ്തിരിക്കുകയാണ്. പട്ടാക്ക സോങ്‌ എന്ന പേരിൽ പുറത്ത് വന്നിരിക്കുന്ന ഈ ഗാനത്തിന്റെ ഹൈലൈറ്റ് ഗ്ലാമർ നായികയായ അപ്സര റാണിയുടെ കിടിലൻ നൃത്തമാണ്. അതീവ ഗ്ലാമർ പ്രദർശനവുമായി അപ്സര റാണി ചുവട് വെക്കുമ്പോൾ സുധീർ ബാബു, ഭരത് എന്നിവരും നൃത്തം ചെയ്ത് കൊണ്ട് കൂടെയുണ്ട്. പാപ്പാ തോ പൈലാം എന്ന വരികളോടെ തുടങ്ങുന്ന ഈ ഗാനത്തിന് സംഗീതമൊരുക്കിയത് ജിബ്രാൻ ആണ്. കാസർല ശ്യാം വരികൾ രചിച്ച ഈ ഗാനം മംഗ്ലി, നകാശ് അസീസ് എന്നിവർ ചേർന്നാണ് ആലപിച്ചിരിക്കുന്നത്. ഭവ്യ ക്രിയേഷൻസിന്റെ ബാനറിൽ ആനന്ദ് പ്രസാദാണ് ഈ ചിത്രം നിർമ്മിച്ചിരിക്കുന്നത്.
മഹേഷ് സുരപാനേനി സംവിധാനം ചെയ്തിരിക്കുന്ന ഈ ചിത്രത്തിന് കാമറ ചലിപ്പിച്ചത് അരുൾ വിൻസെന്റ്, എഡിറ്റ് ചെയ്തിരിക്കുന്നത് പ്രവിൻ പുടി എന്നിവരാണ്. തെലുങ്ക് യുവതാരമായ സുധീർ ബാബു നായകനായി എത്തുന്ന പതിനാറാമത് ചിത്രമാണ് ഹണ്ട്. കിടിലൻ ആക്ഷൻ രംഗങ്ങളായിരിക്കും ഈ ചിത്രത്തിന്റെ ഹൈലൈറ്റെന്നാണ് ഇതിന്റെ ടീസർ സൂചിപ്പിക്കുന്നത്. അർജുൻ എന്ന പോലീസ് ഓഫീസർ കഥാപാത്രമായാണ് സുധീർ ബാബു ഈ ചിത്രത്തിൽ പ്രത്യക്ഷപ്പെടുന്നത്. ഗൺസ് ഡോണ്ട് ലൈ എന്നാണ് ഈ ചിത്രത്തിന്റെ ടൈറ്റിൽ ടാഗ്‌ലൈൻ. ഏതായാലും ആദ്യാവസാനം ത്രസിപ്പിക്കുന്ന ഒരു സ്റ്റൈലിഷ് ആക്ഷൻ ത്രില്ലറായിരിക്കും ഹണ്ടെന്ന പ്രതീക്ഷയിലാണ് ആരാധകരും സിനിമാ പ്രേമികളും.
