തെലുങ്കു സൂപ്പർ താരം നന്ദമുറി ബാലകൃഷ്ണ എന്ന ബാലയ്യയുടെ നൂറ്റിയേഴാം ചിത്രം ഇപ്പോൾ ആരാധകർ ഏറെ കാത്തിരിക്കുന്ന തെലുങ്കു ചിത്രങ്ങളിലൊന്നാണ്. ഇതിന്റെ ഫസ്റ്റ് ലുക്ക് പോസ്റ്റർ നേരത്തെ തന്നെ പുറത്തു വരികയും സൂപ്പർ ഹിറ്റാവുകയും ചെയ്തിരുന്നു. ഇപ്പോഴിതാ, ഈ ചിത്രത്തിന്റെ ആദ്യ ടീസർ പുറത്തു വിട്ടിരിക്കുകയാണ് ഇതിന്റെ അണിയറ പ്രവർത്തകർ. ഇതുവരെ പേരിട്ടിട്ടില്ലാത്ത ഈ ചിത്രം ഇപ്പോൾ എൻ ബി കെ 107 എന്ന പേരിലാണ് അറിയപ്പെടുന്നത്‌. മരണ മാസ്സ് ലുക്കിൽ ബാലയ്യ എത്തുന്ന ഈ ചിത്രത്തിന്റെ ഒരു ടെറാ മാസ്സ് ടീസറാണ് പുറത്തു വന്നിരിക്കുന്നത്. ത്രസിപ്പിക്കുന്ന ആക്ഷനും പഞ്ച് ഡയലോഗുകളുമായി ബാലയ്യ നിറഞ്ഞു നിൽക്കുന്ന ഈ ടീസർ, അദ്ദേഹത്തിന്റെ ജന്മദിനം പ്രമാണിച്ചാണ് പുറത്തു വിട്ടിരിക്കുന്നത്. കറുത്ത ഷർട്ടും നരച്ച താടിയും പിരിച്ചു വെച്ച മീശയും കൂളിംഗ് ഗ്ലാസും അണിഞ്ഞു, മുണ്ടുടുത്താണ് മാസ്സ് ലുക്കിൽ ബാലയ്യ ഈ ചിത്രത്തിലെത്തിയിരിക്കുന്നത്. മൈത്രി മൂവി മേക്കേഴ്‌സ് നിർമ്മിക്കുന്ന ഈ ചിത്രത്തിലെ നായികയായി ശ്രുതി ഹാസനാണ് എത്തുന്നത്. വരലക്ഷ്മി ശരത്കുമാറും ഈ ചിത്രത്തിൽ ഒരു പ്രധാന വേഷം ചെയ്യുന്നുണ്ട്.
ഈ ചിത്രത്തിന്റെ കഥയും തിരക്കഥയുമെഴുതി സംവിധാനം ചെയ്തിരിക്കുന്നത് ഗോപിചന്ദ് മല്ലിനേനി ആണ്. രവി തേജ നായകനായി എത്തിയ സൂപ്പർ ഹിറ്റ് ചിത്രം ക്രാക്ക് ആയിരുന്നു ഗോപിചന്ദ് മല്ലിനേനി തൊട്ടു മുൻപ് സംവിധാനം ചെയ്ത ചിത്രം. തമൻ എസ് സംഗീതമൊരുക്കിയ ഈ ചിത്രത്തിന് ക്യാമറ ചലിപ്പിക്കുന്നത് ഋഷി പഞ്ചാബിയാണ്. സ്റ്റണ്ട് ശിവ, റാം- ലക്ഷ്മൺ ടീം എന്നിവർ സംഘട്ടനമൊരുക്കുന്ന ഈ ചിത്രം എഡിറ്റ് ചെയ്യുന്നത് നവീൻ നൂലിയാണ്. കരിയറിലെ ആദ്യത്തെ നൂറു കോടി ഗ്രോസ് നേടിയ അഖണ്ഡ എന്ന ചിത്രമായിരുന്നു ബാലയ്യയുടെ തൊട്ടു മുൻപത്തെ റിലീസ്. ആ ചിത്രം സംവിധാനം ചെയ്ത ബോയപ്പട്ടി ശ്രീനുവിനോടൊപ്പം വീണ്ടും ഒന്നിക്കാൻ പോവുകയാണ് ബാലയ്യ എന്ന വാർത്തകളും ഇപ്പോൾ വരുന്നുണ്ട്.
