മലയാളത്തിലെ പ്രശസ്ത നടിയായ മീര ജാസ്മിൻ ഇപ്പോൾ അഭിനയ രംഗത്തേക്കുള്ള തിരിച്ചു വരവിന്റെ പാതയിൽ ആണ്. മലയാളത്തിലും അന്യ ഭാഷകളിലുമായി ഇപ്പോൾ ചിത്രങ്ങൾ ചെയ്യുന്ന മീര ജാസ്മിൻ കഴിഞ്ഞ ദിവസമാണ് ഒഫീഷ്യൽ ആയി ഒരു ഇൻസ്റ്റഗ്രാം പ്രൊഫൈൽ ആരംഭിച്ചത്. അതിൽ മീര ഇട്ട ഫോട്ടോകൾ അപ്പോൾ മുതൽ ഏറെ ശ്രദ്ധ നേടിയിരുന്നു. ഇപ്പോഴിതാ തന്റെ ഇൻസ്റ്റാഗ്രാം പ്രൊഫൈലിലൂടെ മീര പുറത്തു വിട്ട ഒരു വീഡിയോ ആണ് എല്ലാവരുടേയും ശ്രദ്ധ നേടുന്നത്. മീരയുടെ ഫ്ലാറ്റ് ആണോ ഹോട്ടൽ മുറി ആണോ എന്ന് സംശയം ജനിപ്പിക്കുന്ന ഒരു മനോഹരമായ വലിയ മുറിയിൽ ആഹ്ളാദ നൃത്തം വെക്കുന്ന മീരയുടെ വീഡിയോ ആണ് പുറത്തു വന്നിരിക്കുന്നത്. ഒരു ഹിന്ദി ഗാനത്തിന്റെ പശ്‌ചാത്തലത്തിൽ ആണ് ഈ നടി നൃത്തം വെക്കുന്നത്. സിനിമയിൽ സജീവമായതിന്റെ സന്തോഷവും ആരാധകരുടെ പിന്തുണ ഏറെ ലഭിക്കുന്നതിന്റെ സന്തോഷവും മീര പങ്കു വെച്ചിട്ടുണ്ട്.
മികച്ച നടിക്കുള്ള ദേശീയ പുരസ്‍കാരം വരെ നേടിയ ഈ മലയാള നടി, മലയാളം കൂടാതെ തമിഴ്, തെലുങ്കു, കന്നഡ ഭാഷകളിലും അഭിനയിച്ചു കയ്യടി നേടിയെടുത്തിട്ടുണ്ട്. ഇപ്പോൾ സത്യൻ അന്തിക്കാട് ഒരുക്കുന്ന പുതിയ ജയറാം ചിത്രത്തിലൂടെ ആണ് മീര ജാസ്മിൻ മലയാള സിനിമയിലേക്ക് മടങ്ങി വരുന്നത്. കുറച്ചു നാൾ മുൻപ് ഷൂട്ടിങ്ങിന്റെ ബ്രേക്ക് ടൈമിൽ തന്റെ കാരവാനിൽ സഹായികൾക്കൊപ്പം നൃത്തം ചെയ്യുന്ന മീരയുടെ ഒരു വീഡിയോയും ഇതുപോലെ സോഷ്യൽ മീഡിയയിൽ സൂപ്പർ ഹിറ്റായിരുന്നു. ഇരുപതു വർഷം മുൻപ് സൂത്രധാരൻ എന്ന ലോഹിതദാസ്- ദിലീപ് ചിത്രത്തിലൂടെ അരങ്ങേറ്റം കുറിച്ച മീര ജാസ്മിൻ പിന്നീട് സൂപ്പർ താരങ്ങളായ മോഹൻലാൽ, മമ്മൂട്ടി, ജയറാം, കുഞ്ചാക്കോ ബോബൻ, പൃഥ്വിരാജ്, എന്നിവരുടെയൊക്കെ നായികാ വേഷം ചെയ്തുകൊണ്ട് മലയാളത്തിലെ ഏറ്റവും മികച്ച നടിമാരിലൊരാൾ എന്ന പേര് നേടിയെടുത്ത ആളാണ്.
