സിംഹള ആർട്ടിസ്റ്റായ യോഹാനിയുടെ സൂപ്പർഹിറ്റ് ഗാനമായ മണിക്കേ മാഗേ ഹിതേ എന്ന ഗാനത്തിന്റെ ഹിന്ദി പതിപ്പാണ് ഇപ്പോൾ സോഷ്യൽ മീഡിയയിൽ തരംഗമായി മാറുന്നത്. താങ്ക് ഗോഡ് എന്ന ഏറ്റവും പുതിയ ബോളിവുഡ് ചിത്രത്തിന് വേണ്ടിയാണ് ഈ ഗാനത്തിന്റെ ഹിന്ദി പതിപ്പൊരുക്കിയത്. നോറ ഫതേഹി, സിദ്ധാർഥ് മൽഹോത്ര എന്നിവരുടെ കിടിലൻ നൃത്തമാണ് ഈ ഗാനത്തിന്റെ ഹൈലൈറ്റ്. അതീവ ഗ്ലാമറസായാണ് നോറ ഈ ഗാനത്തിലും പ്രത്യക്ഷപ്പെട്ടിരിക്കുന്നത്. അജയ് ദേവ്‌ഗൺ, രാകുൽ പ്രീത് സിങ് എന്നിവരും പ്രധാന വേഷങ്ങൾ ചെയ്യുന്ന ഈ ചിത്രത്തിന് വേണ്ടി ഈ ഗാനം റീമിക്സ് ചെയ്തത് തനിഷ്‌ക് ബാഗചി, ചമത് സംഗീത് എന്നിവർ ചേർന്നാണ്. യോഹാനി, ജുബിൻ നൗട്ടിയാൽ, സൂര്യ രഘുനാഥൻ എന്നിവർ ചേർന്നാണ് ഈ ഗാനത്തിന്റെ ഹിന്ദി റീമിക്സ് വേർഷൻ ആലപിച്ചിരിക്കുന്നത്. രശ്മി വിരാഗ്, ഡ്യൂളൻ എ ആർ എക്സ് എന്നിവർ ചേർന്നാണ് ഇതിന്റെ ഹിന്ദി വരികൾ രചിച്ചത്.
ചമത് സംഗീത് ഈണം നൽകിയ ഇതിന്റെ ഒറിജിനൽ വേർഷൻ ആലപിച്ചത് യോഹാനി, സതീശൻ എന്നിവർ ചേർന്നാണ്. ഡ്യൂളൻ എ ആർ എക്സ് ആണിതിന്റെ വരികൾ രചിച്ചത്. ഹിന്ദി വേര്ഷന് വേണ്ടി മെല്ലോ ഡി റാപ് വരികൾ രചിച്ചപ്പോൾ ഗണേഷ് ഹെഗ്‌ഡെയാണ് ഇതിന് വേണ്ടി നൃത്ത സംവിധാനം നിർവഹിച്ചത്. രണ്ടു ദിവസം മുൻപ് റിലീസ് ചെയ്ത ഈ വീഡിയോക്ക് ഇതിനോടകം രണ്ടര കോടിയോളം കാഴ്ചക്കാരെ ലഭിച്ചു കഴിഞ്ഞു. ടി സീരിസിന്റെ യൂട്യൂബ് ചാനലിലാണ് ഈ വീഡിയോ സോങ് റിലീസ് ചെയ്തത്. ഇന്ദ്ര കുമാർ സംവിധാനം ചെയ്തിരിക്കുന്ന ഈ കോമഡി ചിത്രം ദീപാവലി റിലീസായി പ്രേക്ഷകരുടെ മുന്നിലെത്തും.
