മലയാളത്തിന്റെ മഹാനടൻ മോഹൻലാൽ നായകനായി എത്തിയ മോൺസ്റ്റർ ഈ കഴിഞ്ഞ ഒക്ടോബറിൽ ആണ് റീലീസ് ചെയ്തത്. ഡിസംബർ രണ്ടിന് ഈ ചിത്രം ഒറ്റിറ്റി റിലീസായും എത്തി. മോഹൻലാൽ, ഹണി റോസ്, ലക്ഷ്മി മൻചു, സുദേവ് നായർ എന്നിവർ പ്രധാന വേഷങ്ങൾ ചെയ്ത ഈ ചിത്രം സംവിധാനം ചെയ്തത് സൂപ്പർ ഹിറ്റ് സംവിധായകൻ വൈശാഖും ഈ ചിത്രം രചിച്ചത് ഉദയകൃഷ്ണയുമാണ്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ഈ ചിത്രം, ഇതിലെ എൽജിബിറ്റിക്യൂ രംഗങ്ങളുടെ പേരിൽ ഗൾഫിൽ നിരോധിക്കപ്പെട്ടിരുന്നു. വളരെ ശക്തമായ, പരീക്ഷണ സ്വഭാവമുള്ള ഒരു പ്രമേയം അവതരിപ്പിച്ച ഈ ചിത്രത്തിൽ സ്വവർഗാനുരാഗികൾ ആയാണ് ഹണി റോസും ലക്ഷ്മി മാഞ്ചുവും അഭിനയിച്ചത്‌.
ഇപ്പോഴിതാ ഇരുവരുടെയും പ്രണയ രംഗങ്ങൾ ഉൾപ്പെടുത്തിയ ഇതിലെ ഹൈ ഓണ് ഡിസയർ എന്ന ഗാനത്തിന്റെ വീഡിയോ റീലീസ് ചെയ്തിരിക്കുകയാണ്. ദീപക് ദേവ് ഈണം പകർന്ന ഈ ഗാനം രചിച്ചത് ജോർജ് പീറ്ററും ആലപിച്ചത് സായനോര ഫിലിപ്പുമാണ്. നായികാ താരങ്ങളുടെ ഇഴുകി ചേർന്നുള്ള രംഗങ്ങൾ തന്നെയാണ് ഈ ഗാനത്തിന്റെ ഹൈലൈറ്റ്. ഇതിലെ ഭാമിനി എന്ന കഥാപാത്രമായി ഹണി റോസ് കാഴ്ച്ച വെച്ചത് ഈ നടിയുടെ കരിയർ ബെസ്റ്റ് പ്രകടനമാണ്. തെലുങ്ക് നടിയായ ലക്ഷ്മി ശ്രദ്ധ നേടിയത് ഇതിൽ അവർ കാഴ്ച്ചവെച്ച ഗംഭീര ആക്ഷൻ പ്രകടനം കൊണ്ടാണ്. ലെന, ഗണേഷ് കുമാർ, സിദ്ദിഖ്, ജോണി ആന്റണി, ജഗപതി ബാബു, അഞ്ജലി നായർ, സാധിക എന്നിവരും ഈ ചിത്രത്തിൽ അഭിനയിച്ചിട്ടുണ്ട്. ഇൻഡസ്ട്രി ഹിറ്റായ പുലിമുരുകന് ശേഷം മോഹൻലാലും വൈശാഖും ഉദയ കൃഷ്ണയും ഒന്നിച്ച ചിത്രം കൂടിയാണിത്.
