ബാഹുബലി എന്ന ബ്രഹ്മാണ്ഡ ചിത്രത്തിന്റെ അതി ഗംഭീര വിജയത്തിന് ശേഷം എസ് എസ് രാജമൗലി ഒരുക്കുന്ന പുതിയ ചിത്രമാണ് ആർ ആർ ആർ. റാം ചരൺ, ജൂനിയർ എൻ ടി ആർ, ബോളിവുഡ് താരം അജയ് ദേവ്‌ഗൺ, ആലിയ ഭട്ട് എന്നിവർ പ്രധാന വേഷം ചെയ്യുന്ന ഈ ചിത്രം ഒക്ടോബറിൽ പൂജ റിലീസ് ആയി റിലീസ് ചെയ്യും എന്നാണ് അണിയറ പ്രവർത്തകർ അറിയിച്ചിരിക്കുന്നത്. ഈ ചിത്രത്തിന്റെ ടീസറുകൾ നേരത്തെ തന്നെ പുറത്തു വരികയും വമ്പൻ പ്രേക്ഷക ശ്രദ്ധ നേടുകയും ചെയ്തിരുന്നു. ഇപ്പോഴിതാ ഇതിന്റെ ഒരു കിടിലൻ മേക്കിങ് വീഡിയോ കൂടി പുറത്തു വിട്ടിരിക്കുകയാണ് അണിയറ പ്രവർത്തകർ. ഇന്ത്യൻ സിനിമയിലെ ഏറ്റവും വലിയ ആക്ഷൻ ചിത്രമായി ആർ ആർ ആർ മാറുമെന്നാണ് ഈ മേക്കിങ് വീഡിയോ സൂചിപ്പിക്കുന്നത്. ഇന്ത്യൻ സ്വാതന്ത്ര്യ സമരത്തിന്റെ പശ്ചാത്തലത്തിലാണ് ഈ ചിത്രം ഒരുങ്ങിയിരിക്കുന്നത് എന്നാണ് സൂചന. കെ വി വിജയേന്ദ്ര പ്രസാദ് എഴുതിക്കിയ കഥയ്ക്ക് എസ് എസ് രാജമൗലി തന്നെ തിരക്കഥ രചിച്ചിരിക്കുന്ന ഈ ചിത്രം നിർമ്മിക്കുന്നത് ഡി വി വി എന്റെർറ്റൈന്മെന്റ്സ് ആണ്.
കെ കെ സെന്തിൽ കുമാർ ക്യാമറ ചലിപ്പിക്കുന്ന ഈ ചിത്രം എഡിറ്റ് ചെയ്യുന്നത് ശ്രീകർ പ്രസാദ് ആണ്. നാനൂറു കോടിയോളം രൂപ മുതൽ മുടക്കിൽ ആണ് ഈ ചിത്രം നിർമ്മിക്കുന്നത്. കീരവാണി സംഗീതം നൽകുന്ന ഈ ചിത്രത്തിൽ ഒളിവിയ മോറിസ്, സമുദ്രക്കനി, റേ സ്റ്റീവൻസൺ, അലിസൻ ഡൂഡി, ശ്രിയ സരൺ, ഛത്രപതി ശേഖർ, രാജീവ് കനകാല എന്നിവരും അഭിനയിച്ചിരിക്കുന്നു. ഈ ചിത്രത്തിൽ കോമരം ഭീം ആയാണ് ജൂനിയർ എൻ ടി ആർ അഭിനയിക്കുന്നത് എങ്കിൽ അല്ലൂരി സീതാരാമ രാജു ആയാണ് റാം ചരൺ അഭിനയിക്കുന്നത്. സീത എന്ന കഥാപാത്രമായാണ് ആലിയ ഭട്ട് ഇതിൽ പ്രത്യക്ഷപ്പെടുന്നത്.
