മലയാളത്തിന്റെ മഹാനടൻ മോഹൻലാൽ നായകനായി എത്തുന്ന ഏറ്റവും പുതിയ ചിത്രമാണ് മോൺസ്റ്റർ. വൈശാഖ് സംവിധാനം ചെയ്ത ഈ ചിത്രത്തിലെ ആദ്യ ഗാനം ഇന്ന് റിലീസ് ചെയ്തിരിക്കുകയാണ്. ഒരു ത്രില്ലറായി ഒരുക്കിയിരിക്കുന്ന ഈ ചിത്രത്തിലെ ഏക ഗാനമാണ് ഇതെന്നാണ് സൂചന. ഗാനങ്ങൾക്ക് പ്രാധാന്യം ഇല്ലാത്തത് കൊണ്ട് തന്നെ വളരെ ചെറിയൊരു ഗാനമായാണ് ഇതൊരുക്കിയിരിക്കുന്നത്. പഞ്ചാബി സ്റ്റൈലിൽ നൃത്തം ചെയ്യുന്ന മോഹൻലാൽ തന്നെയാണ് ഈ ഗാനത്തിന്റെ ഹൈലൈറ്റ്. മോഹൻലാലിന്റെ രസകരമായ നൃത്തച്ചുവടുകൾ നിറഞ്ഞ ഈ ഗാനരംഗത്തിൽ സുദേവ് നായർ, ഹണി റോസ്, ലക്ഷ്മി മാഞ്ചു, ഒരു ബാലതാരം എന്നിവരും അഭിനയിക്കുന്നുണ്ട്. ഗൂമ് ഗൂമ് എന്ന വരികളോടെ തുടങ്ങുന്ന ഈ ഗാനം രചിച്ചത് തനിഷ്‌ക് നാബർ, ഹരിനാരായണൻ എന്നിവരാണ്. അലി കുലി മിർസ, പ്രകാശ് ബാബു, സിയാ ഉൾ ഹഖ് എന്നിവരാണ് ഈ ഗാനം ആലപിച്ചിരിക്കുന്നത്.
ദീപക് ദേവാണ് ഈ ചിത്രത്തിന്റെ സംഗീത സംവിധായകൻ. ആറ് വർഷങ്ങൾക്കു ശേഷം മോഹൻലാൽ- വൈശാഖ്- ഉദയകൃഷ്ണ ടീം ഒന്നിച്ച ഈ ചിത്രം ഒക്ടോബർ ഇരുപത്തിയൊന്നിനാണ് റിലീസ് ചെയ്യുക. ലക്കി സിങ് എന്ന കഥാപാത്രമായി മോഹൻലാൽ എത്തുന്ന ഈ ചിത്രത്തിൽ ജോണി ആന്റണി, കോട്ടയം രമേശ്, സുദേവ് നായർ, ഹണി റോസ്, ഗണേഷ് കുമാർ, സിദ്ദിഖ്, ലക്ഷ്മി മഞ്ചു, ലെന, ഇടവേള ബാബു തുടങ്ങി ഒരുപിടി പ്രശസ്ത താരങ്ങൾ അഭിനയിച്ചിട്ടുണ്ട്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ചിരിക്കുന്ന ഈ ചിത്രത്തിന് എഡിറ്റിംഗ് നിർവഹിച്ചിരിക്കുന്നത് ഷമീർ മുഹമ്മദാണ്. സതീഷ് കുറുപ്പാണ് ഇതിന്റെ ക്യാമറാമാൻ.
