ഇരുപതു കൊല്ലം മുൻപ് റിലീസ് ചെയ്തു സൂപ്പർ ഹിറ്റായ കമൽ ഹാസൻ ചിത്രമാണ് പഞ്ചതന്തിരം. ഒരു പക്കാ കോമഡി എന്റെർറ്റൈനെർ ആയൊരുക്കിയ ഈ ചിത്രത്തിൽ കമൽ ഹാസനൊപ്പം ജയറാം, രമേശ് അരവിന്ദ്, ശ്രീമാൻ, യോഗി സേതു, സിമ്രാൻ, രമ്യ കൃഷ്ണൻ, ഉർവശി, ഐശ്വര്യ, സംഘ്‌വി, വിദ്യ വെങ്കിടേഷ് എന്നിവരും വേഷമിട്ടിരുന്നു. കെ എസ് രവികുമാർ, കമൽ ഹാസൻ എന്നിവർ ചേർന്ന് രചിച്ച ഈ ചിത്രം സംവിധാനം ചെയ്തത് കെ എസ് രവി കുമാറും നിർമ്മിച്ചത് ശ്രീ രാജലക്ഷ്മി ഫിൽംസിന്റെ ബാനറിൽ പി എൽ തേനപ്പനുമാണ്. ഈ ചിത്രം വിതരണം ചെയ്തത് കമൽ ഹാസൻ തന്നെയാണ്. ഏതായാലും തമിഴിലെ ക്ലാസിക് കോമഡി ഹിറ്റുകളിൽ ഒന്നായി മാറിയ ഈ ചിത്രത്തിൽ അഞ്ചു പ്രധാന വേഷങ്ങൾ ചെയ്ത കമൽ, ജയറാം, രമേശ് അരവിന്ദ്, ശ്രീമാൻ, യോഗി സേതു എന്നിവരുടെ കോമ്പിനേഷൻ വലിയ തരംഗമായി മാറി. ഇപ്പോൾ കമൽ ഹാസന്റെ ഏറ്റവും പുതിയ ചിത്രമായ വിക്രമിന്റെ പ്രൊമോഷന് വേണ്ടി ഈ കോംബിനേഷൻ ഒരുമിച്ചു ചേർന്ന് ഒരു പ്രൊമോഷൻ വീഡിയോ ചെയ്തിരുന്നു.
വലിയ രീതിയിലാണ് ആ വീഡിയോയും സ്വീകരിക്കപ്പെട്ടത്. അതോടുകൂടി തന്നെ ഇവർ വീണ്ടും ഒരുമിക്കുന്ന പഞ്ചതന്തിരം 2 വേണമെന്ന് ആവശ്യപ്പെടുകയാണ് ആരാധകർ. ഈ കാര്യം ഒരു തമിഴ് ചാനൽ അഭിമുഖത്തിൽ ജയറാമിന്റെ മകനും, വിക്രമിലെ ഒരു താരവുമായ കാളിദാസ് ജയറാമിനോട് ചോദിച്ചപ്പോൾ, താനും ആ രണ്ടാം ഭാഗത്തിനായി കാത്തിരിക്കുകയാണെന്നാണ് കാളിദാസ് ജയറാം പറഞ്ഞത്. ആ കോമ്പിനേഷനിൽ ഒരു കോമഡി ചിത്രം കാണാൻ തനിക്കുമാഗ്രഹമുണ്ടെന്നും അദ്ദേഹം പറഞ്ഞു. ആ ചിത്രം ഷൂട്ട് ചെയ്യുന്ന സമയത്തു ഒരു പിക്നിക് പോലെ അവർ പോയി അഭിനയിച്ച ചിത്രമാണതെന്നും കാളിദാസ് ഓർക്കുന്നു. ഈ അടുത്തിടെ പിങ്ക് വില്ലക്കു നൽകിയ അഭിമുഖത്തിൽ തനിക്കൊരു പക്കാ കോമഡി ചിത്രം ചെയ്യാനാഗ്രമുണ്ടെന്നു കമൽ ഹാസനും വ്യക്തമാക്കിയിരുന്നു.
