മലയാളത്തിന്റെ ആക്ഷൻ സൂപ്പർ സ്റ്റാർ സുരേഷ് ഗോപി ഒരിടവേളക്ക് ശേഷം വീണ്ടും നടനെന്ന നിലയിൽ മലയാള സിനിമയിൽ സജീവമാവുകയാണ്. എം പി കൂടിയായ അദ്ദേഹം ഈ വർഷമാദ്യമാണ് വരനെ ആവശ്യമുണ്ട് എന്ന സൂപ്പർ ഹിറ്റ് അനൂപ് സത്യൻ ചിത്രത്തിലൂടെ നായകനായി വലിയ തിരിച്ചു വരവ് നടത്തിയത്. അതിനു ശേഷം നിതിൻ രഞ്ജി പണിക്കർ ഒരുക്കുന്ന കാവൽ എന്ന ചിത്രത്തിലാണ് അദ്ദേഹം ജോയിൻ ചെയ്തത്. എന്നാൽ രണ്ടു ദിവസം മുൻപ് പുറത്തു വന്ന ഒരു മ്യൂസിക് വീഡിയോയിലെ അദ്ദേഹത്തിന്റെ മാസ്സ് ലുക്ക് സോഷ്യൽ മീഡിയയിൽ ഒട്ടേറെ വ്യാജ പ്രചാരണങ്ങൾക്കിടയാക്കി. പൃഥ്വിരാജ് സുകുമാരനെ നായകനാക്കി ഷാജി കൈലാസ് ഒരുക്കാൻ പോകുന്ന കടുവ എന്ന ചിത്രത്തിൽ സുരേഷ് ഗോപി കൂടി അഭിനയിക്കുമെന്നും അതിനു വേണ്ടി ഉള്ളതാണ് ഈ മാസ്സ് ലുക്ക് എന്നും ചിലർ പറഞ്ഞപ്പോൾ, കാവൽ എന്ന സിനിമയിലെ മറ്റൊരു ലുക്കാണ് ഇതെന്ന് മറ്റു ചിലർ പറഞ്ഞു. എന്നാലിപ്പോൾ തന്റെ പുതിയ ലുക്കിനെ കുറിച്ച് പ്രചരിക്കുന്ന വ്യാജ വാർത്തകൾ തള്ളിക്കളഞ്ഞു കൊണ്ട് രംഗത്ത് വന്നിരിക്കുകയാണ് സുരേഷ് ഗോപി.
ഈ പുതിയ ലുക്ക് തന്റെ ഇരുനൂറ്റിയന്പതാമത്തെ ചിത്രത്തിന് വേണ്ടി ഉള്ളതാണെന്നും അധികം വൈകാതെ നടക്കാൻ പോകുന്ന അതിന്റെ ഫോട്ടോഷൂട്ടിന് വേണ്ടിയാണു ഇപ്പോൾ ഈ ലുക്ക് വെച്ചിരിക്കുന്നതെന്നും സുരേഷ് ഗോപി പറയുന്നു. നരച്ച താടിയും നീളമുള്ള കറുത്ത മീശയും വെച്ച് കിടിലൻ ലുക്കിലാണ് സുരേഷ് ഗോപി ഈ ചിത്രത്തിൽ പ്രത്യക്ഷപ്പെടുക. മാത്യൂസ് തോമസ് ആണ് അദ്ദേഹത്തിന്റെ ഇരുന്നൂറ്റിയന്പതാം ചിത്രം സംവിധാനം ചെയ്യുന്നത് എന്നും സുരേഷ് ഗോപി അറിയിച്ചു. അതിനു ശേഷം അദ്ദേഹം ചെയ്യുന്നത് രാഹുൽ സംവിധാനം ചെയ്യുന്ന ഒരു ചിത്രമാണെന്നും കാവലിന്റെ അടുത്ത ഷെഡ്യൂളിന് വേണ്ടി, ആദ്യം പറഞ്ഞ ഫോട്ടോ ഷൂട്ടിന് ശേഷം, താൻ ക്ലീൻ ഷേവ് ചെയ്യുമെന്നും സുരേഷ് ഗോപി ഫേസ്ബുക് പോസ്റ്റിൽ പറയുന്നു. രണ്ടു ദിവസം മുൻപ് റിലീസ് ചെയ്ത കായങ്ങൾ നൂറ് എന്ന മ്യൂസിക്കൽ ആൽബത്തിലാണ് സുരേഷ് ഗോപി ഈ ലുക്കിൽ പ്രത്യക്ഷപ്പെട്ടത്.
