കംപ്ലീറ്റ് ആക്ടർ മോഹൻലാലിനെ നായകനാക്കി പ്രിയദർശൻ ഒരുക്കുന്ന ബ്രഹ്മാണ്ഡ ചിത്രമാണ് മരക്കാർ: അറബിക്കടലിന്റെ സിംഹം. മോഹൻലാൽ മരക്കാർ നാലാമൻ ആയി ടൈറ്റിൽ വേഷത്തിൽ എത്തുന്ന ഈ ചിത്രത്തിൽ തമിഴ്, ഹിന്ദി ഭാഷകളിൽ നിന്നും ബ്രിട്ടീഷ്, ചൈനീസ് ഭാഷകളിൽ നിന്നും വരെ അഭിനേതാക്കൾ ഉണ്ട്. ഇപ്പോഴിതാ പ്രശസ്ത ബോളിവുഡ് താരം സുനിൽ ഷെട്ടി ഈ ചിത്രത്തിൽ ജോയിൻ ചെയ്തു കഴിഞ്ഞു. ഹോളിവുഡ് ഫിലിം ട്രോയിലെ കേന്ദ്ര കഥാപാത്രത്തെ അനുസ്മരിപ്പിക്കുന്ന വിധത്തിലുള്ള പടച്ചട്ടയണിഞ്ഞാണ് സുനിൽ ഷെട്ടി ഈ ചിത്രത്തിൽ പ്രത്യക്ഷപ്പെട്ടിരിക്കുന്നത്. ഒരു യോദ്ധാവിന്റെ വേഷമാണ് സുനിൽ ഷെട്ടി ഇതിൽ അവതരിപ്പിക്കുന്നത്. കിടിലൻ ആക്ഷൻ രംഗങ്ങൾ ആയിരിക്കും അദ്ദേഹം ഈ ചിത്രത്തിൽ അവതരിപ്പിക്കുന്നത് എന്നാണ് റിപ്പോർട്ടുകൾ പറയുന്നത്. സുനിൽ ഷെട്ടിയുടെ കിടിലൻ ലുക്കിൽ ഉള്ള ലൊക്കേഷൻ ചിത്രങ്ങൾ ഇപ്പോൾ തന്നെ സോഷ്യൽ മീഡിയയിൽ വൈറൽ ആയി കഴിഞ്ഞു.
സാബു സിറിൽ പ്രൊജക്റ്റ് ഡിസൈനർ ആയി എത്തുന്ന ഈ ചിത്രത്തിൽ മലയാളത്തിൽ നിന്ന് പ്രണവ് മോഹൻലാൽ, മധു, മഞ്ജു വാര്യർ, നെടുമുടി വേണു, മുകേഷ്, സിദ്ദിഖ്, രഞ്ജി പണിക്കർ, കീർത്തി സുരേഷ് എന്നിവർ ആണുള്ളത്. പ്രിയദർശന്റെ മകൾ കല്യാണി പ്രിയദർശനും അഭിനയിക്കുന്ന ഈ ചിത്രത്തിൽ തമിഴിൽ നിന്ന് അർജുൻ, പ്രഭു, പൂജ കുമാർ എന്നിവരും ഉണ്ട്. തിരു കാമറ ചലിപ്പിക്കുന്ന ഈ ചിത്രത്തിനു സംഗീതം ഒരുക്കുന്നത് റോണി റാഫേൽ ആണ്. നൂറു കോടി രൂപ മുതൽ മുടക്കി മലയാള സിനിമയിലെ എക്കാലത്തെയും വലിയ പ്രൊജക്റ്റ് ആയി ഒരുക്കുന്ന ഈ ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ. കോൺഫിഡന്റ് ഗ്രൂപ്പ് ന്റെ ബാനറിൽ ഡോക്ടർ സി ജെ റോയ്, മൂൺഷോട്ട് എന്റെർറ്റൈന്മെന്റിന്റെ ബാനറിൽ സന്തോഷ് ടി കുരുവിള എന്നിവർ ചേർന്ന് ആണ് നിർമ്മിക്കുന്നത്.
