പ്രശസ്ത സംവിധായകൻ റോഷൻ ആൻഡ്രൂസ് സംവിധാനം ചെയ്ത പുതിയ ചിത്രമാണ് പ്രതി പൂവൻ കോഴി. മഞ്ജു വാര്യർ നായികാ വേഷം ചെയ്യുന്ന ഈ ചിത്രം ഈ ആഴ്ച അവസാനത്തോടെ റിലീസ് ചെയ്യാൻ പോവുകയാണ്. ഈ ചിത്രത്തിലെ പ്രതിനായക വേഷം ചെയ്തു കൊണ്ട് റോഷൻ ആൻഡ്രൂസും നടനായി അരങ്ങേറ്റം കുറിക്കുകയാണ്. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ നിർമ്മിച്ച പ്രതി പൂവൻ കോഴി രചിച്ചത് ഉണ്ണി ആർ ആണ്. ഇപ്പോഴിതാ ഈ ചിത്രത്തെ കുറിച്ചും മഞ്ജു വാര്യർ എന്ന നടിയെ കുറിച്ചും മനസ്സ് തുറക്കുകയാണ് റോഷൻ ആൻഡ്രൂസ്.
വീണ്ടും മഞ്ജുവിനൊപ്പം പ്രവര്‍ത്തിക്കാന്‍ സാധിച്ചതില്‍ അഭിമാനമുണ്ടെന്ന് ആണ് റോഷൻ ആൻഡ്രൂസ് പറയുന്നത്. ഹൗ ഓള്‍ഡ് ആര്‍ യൂ എന്ന ചിത്രത്തിന് ശേഷം മഞ്ജു വാര്യരും റോഷന്‍ ആന്‍ഡ്രൂസും ഒന്നിച്ച ചിത്രമാണ് പ്രതി പൂവൻ കോഴി. മാധുരി എന്ന സെയില്‍സ് ഗേള്‍ ആയി മഞ്ജു ഈ ചിത്രത്തിൽ വേഷമിടുമ്പോള്‍ ആന്‍പ്പന്‍ എന്ന വില്ലന്‍ ആയാണ് റോഷൻ ആൻഡ്രൂസ് ഇതിൽ അഭിനയിക്കുന്നത്. മഞ്ജു വാര്യർ എന്ന നടിയെ കുറിച്ച് തിലകന്‍ സാര്‍ പലവട്ടം പറഞ്ഞിട്ടുണ്ട് എന്നും ലോകത്ത് ഒരാളുടെ മുന്നില്‍ നിന്നപ്പോള്‍ മാത്രമേ താനൊന്നു വിറച്ചുപോയിട്ടുള്ളൂ, അത് മഞ്ജുവിന്റെ മുന്നിലാണെന്ന് തിലകൻ സർ പറഞ്ഞ കാര്യവും റോഷൻ വെളിപ്പെടുത്തുന്നു.
തിലകന്‍ സാര്‍ വരെ അങ്ങനെ ആദരവോടെ കാണുന്ന മഞ്ജു വാര്യർ എന്ന പ്രതിഭ തന്റെ സുഹൃത്ത് ആണെന്ന് പറയുന്നതിലും മഞ്ജുവിനൊപ്പം വീണ്ടും ഒന്നിച്ച് പ്രവര്‍ത്തിക്കുന്നതിലും തനിക്കു അഭിമാനമുണ്ട് എന്നാണ് റോഷൻ പറയുന്നത്. വളരെ റിയലിസ്റ്റിക് ആയ അഭിനയമാണ് മഞ്ജുവിന്റേത് എന്നും അഭിനയമെന്നതിനേക്കാള്‍ റിയല്‍ ആയി പെരുമാറുകയാണ് ചെയ്തത് എന്നും റോഷൻ വിശദീകരിക്കുന്നു. ഹൗ ഓള്‍ഡ് ആര്‍ യൂ എന്ന റോഷൻ ആൻഡ്രൂസ് ചിത്രത്തിലൂടെ ആണ് അഞ്ചു വർഷം മുൻപേ മഞ്ജു വാര്യർ അഭിനയ രംഗത്തേക്ക് തിരിച്ചെത്തിയത്.
