ഈ ആഴ്‍ചത്തെ മലയാളം റിലീസ് ആയി എത്തിയ ചിത്രങ്ങളിൽ ഒന്നായ പോക്കിരി സൈമൺ ഇപ്പോൾ പ്രേക്ഷകരുടെ മികച്ച അഭിപ്രായം നേടി ബോക്സ് ഓഫീസിൽ കുതിക്കുന്ന കാഴ്ചയാണ് കാണാൻ കഴിയുന്നത്. ജിജോ ആന്റണി ഒരുക്കിയ ഈ മാസ്സ് എന്റെർറ്റൈനെർ, നായകനായ സണ്ണി വെയ്‌നിന്റെ കരിയറിലെ ഏറ്റവും വലിയ ബജറ്റിൽ ഒരുക്കിയ ചിത്രം ആണ്. അതുപോലെ തന്നെ സണ്ണിയുടെ കരിയറിലെ ഏറ്റവും വലിയ റിലീസായും ആണ് ഈ ചിത്രം എത്തിയത്.
ഈ ചിത്രം സണ്ണി വെയ്‌നിന്റെ കരിയറിലെ ഏറ്റവും മികച്ച ഓപ്പണിങ് ആണ് സ്വന്തം ആക്കിയത്. കെ അമ്പാടി തിരക്കഥ രചിച്ച ഈ ചിത്രത്തിൽ ശരത് കുമാർ, ജേക്കബ് ഗ്രിഗറി, സൈജു കുറുപ്പ്, നെടുമുടി വേണു, ദിലീഷ് പോത്തൻ, ഷമ്മി തിലകൻ, അശോകൻ എന്നിവരും പ്രധാന വേഷങ്ങൾ അവതരിപ്പിച്ചിട്ടുണ്ട്. ശ്രീവരി ഫിലിമ്സിന്റെ ബാനറിൽ കൃഷ്ണൻ സേതു കുമാർ നിർമ്മിച്ച ഈ ചിത്രം എല്ലാ വിനോദ ഘടകങ്ങളും കോർത്തിണക്കിയ ഒരടിപൊളി ചിത്രമാണ്. കടുത്ത വിജയ് ആരാധകൻ ആയ സൈമൺ ആയാണ് സണ്ണി വെയ്ൻ ഈ ചിത്രത്തിൽ അഭിനയിച്ചിരിക്കുന്നത്.
വിജയ് ആരാധകരുടെ കഥ പറയുന്ന ഈ ചിത്രം കേരളത്തിലെ വിജയ് ആരാധകർ നിറഞ്ഞ മനസ്സോടെ ആണ് സ്വീകരിച്ചിരിക്കുന്നത്. കഴിഞ്ഞ ദിവസം ചിത്രത്തിന്റെ സംവിധായകൻ ജിജോ ആന്റണി ചിത്രത്തെ അനാവശ്യമായി വിമർശിക്കുന്ന ബുദ്ധിജീവി നിരൂപകർക്കെതിരെ ഫേസ്ബുക് പോസ്റ്റും ആയി രംഗത്ത് വന്നിരുന്നു. എന്തായാലും വിമർശനങ്ങളെ അതിജീവിച്ചു മികച്ച വിജയത്തിലേക്കാണ് പോക്കിരി സൈമൺ കുതിക്കുന്നത്‌.
