മലയാള സിനിമയിലെ എക്കാലത്തെയും മികച്ച ചിത്രങ്ങളിൽ ഒന്നാണ് ദൃശ്യം. 2013ൽ പുറത്തിറങ്ങിയ ഈ ചിത്രം സംവിധാനം ചെയ്തത് ജീത്തു ജോസഫായിരുന്നു. മലയാളത്തിലെ ഇൻഡസ്‌ട്രി ഹിറ്റായിരുന്ന ദൃശ്യം ഒരുപാട് ഭാഷകളിലേക്ക് റീമേക്ക് ചെയ്തിരുന്നു. തമിഴിൽ കമൽ ഹാസൻ നായകനായിയെത്തിയ ‘പാപനാശം’ എന്ന പേരിലാണ് പ്രദർശനത്തിനെത്തിയത്. ജീത്തു ജോസഫായിരുന്നു തമിഴ് പതിപ്പ് സംവിധാനം ചെയ്തിരുന്നത്. 2015ൽ അജയ് ദേവ്ഗൺ നായകനാക്കി ദൃശ്യം എന്ന പേരിൽ തന്നെ ഹിന്ദിയിൽ റീമേക്ക് ചെയ്തിരുന്നു. ഹിന്ദി പതിപ്പ് നിഷികാന്ത് കമ്മത്താണ് സംവിധാനം ചെയ്തിരുന്നത്. വെങ്കടേശിനെ നായകനാക്കി ശ്രീപ്രിയ തെലുഗിൽ ധ്രുശ്യം എന്ന പേരിൽ പ്രദർശനത്തിനെത്തിച്ചിരുന്നു. ഇന്ത്യയിലെ എല്ലാ ഭാഷകളിലും വൻ വിജയം കരസ്ഥമാക്കിയ ചിത്രം കടൽ കടന്നും മറ്റൊരു റെക്കോർഡ് സ്വന്തമാക്കിയിരിക്കുകയാണ്.
ദൃശ്യത്തിന്റെ ശ്രീലങ്കൻ പതിപ്പ് ഈ അടുത്താണ് റിലീസ് ചെയ്തിരുന്നത്. മികച്ച പ്രതികരണം നേടിയ ചിത്രം ശ്രീലങ്കയിലെ എക്കാലത്തെയും വലിയ സൂപ്പര്ഹിറ്റുകളിൽ ഒന്നായി മാറിയിരുക്കുകയാണ്. ‘ധർമ്മയുദ്ധാ’ എന്നാണ് ശ്രീലങ്കൻ പതിപ്പിന്റെ ടൈറ്റിൽ. ചെയ്യാർ രവിയാണ് ചിത്രം സംവിധാനം ചെയ്തിരിക്കുന്നത്. ‘ഹരിചന്ദ്ര’ എന്ന ചിത്രത്തിലൂടെ ഏറെ ശ്രദ്ധേയനായ സംവിധായകൻ കൂടിയാണ് അദ്ദേഹം. ജാക്സൻ ആന്റണിയാണ് മോഹൻലാലിന്റെ വേഷം കൈകാര്യം ചെയ്തത്. ‘ധർമ്മയുദ്ധാ’ എന്ന ചിത്രത്തിന്റെ വിജയാഘോഷം പങ്കിടുവാൻ ദൃശ്യത്തിന്റെ സംവിധായകൻ കൂടിയായ ജീത്തു ജോസഫിനെ ശ്രീലങ്കയിലേക്ക് അണിയറ പ്രവർത്തകർ ക്ഷണിച്ചിരുന്നു. ശ്രീലങ്കയിൽ റെക്കോർഡുകൾ സ്ഥാപിച്ചു ചിത്രം മുന്നേറുകയാണ്. മലയാളികൾക്ക് എന്നും അഭിമാനിക്കാവുന്ന ഒരു ചിത്രം കൂടിയാണ് ‘ദൃശ്യം’. മലയാളത്തിൽ മൂന്ന് വർഷങ്ങൾക്ക് മുമ്പ് പ്രദർശനത്തിനെത്തിയ ദൃശ്യം എന്ന സിനിമക്ക് വേണ്ടി ഇന്നും അന്യ ഭാഷകളിൽ നിന്ന് വലിയ കമ്പനികൾ റീമേക്ക് അവകാശം തേടിയെത്തുന്നുണ്ട്.
