മെഗാസ്റ്റാർ മമ്മൂട്ടിയെ നായകനാക്കി നവാഗതനായ റോബി വർഗീസ് രാജ് ഒരുക്കിയ ചിത്രമാണ് കണ്ണൂർ സ്‌ക്വാഡ്. കഴിഞ്ഞ വർഷം റിലീസ് ചെയ്ത ഈ ഇൻവെസ്റ്റിഗേഷൻ ത്രില്ലർ സൂപ്പർ ഹിറ്റായി മാറിയിരുന്നു. മമ്മൂട്ടി കമ്പനിയുടെ ബാനറിൽ മമ്മൂട്ടി തന്നെ നിർമ്മിച്ച ഈ ചിത്രം 80 കോടിയോളമാണ് ആഗോള ഗ്രോസ് ആയി നേടിയത്. മമ്മൂട്ടിയുടെ കരിയറിലെ ഏറ്റവും വലിയ രണ്ടാമത്തെ ഹിറ്റായും ഈ ചിത്രം മാറി.
ഒരു റിയലിസ്റ്റിക് ഇൻവെസ്റ്റിഗേഷൻ ത്രില്ലറായി ഒരുക്കിയ ഈ ചിത്രത്തിന്റെ തിരക്കഥ രചിച്ചത് പ്രശസ്ത നടൻ റോണി ഡേവിഡ് രാജ്, മുഹമ്മദ് ഷാഫി എന്നിവർ ചേർന്നാണ്. യഥാർത്ഥ സംഭവങ്ങളെ ആസ്പദമാക്കിയാണ് അവർ ഈ ചിത്രത്തിന്റെ തിരക്കഥ രചിച്ചത്. എന്നാൽ കഴിഞ്ഞ ദിവസം സമൂഹ മാധ്യമങ്ങളിൽ പ്രചരിച്ച ഒരു വാർത്ത കണ്ണൂർ സ്‌ക്വാഡിന് ഒരു രണ്ടാം ഭാഗം വരുന്നു എന്നാണ്. തിരക്കഥ രചന പുരോഗമിക്കുന്ന ഈ രണ്ടാം ഭാഗം അടുത്ത വർഷമായിരിക്കും ഒരുക്കുക എന്നും വാർത്തകളിൽ പറഞ്ഞു.
എന്നാൽ ഈ വാർത്ത നിഷേധിച്ചു കൊണ്ട് രംഗത്ത് വന്നിരിക്കുകയാണ് ചിത്രത്തിന്റെ രചയിതാവായ റോണി ഡേവിഡ് രാജ്. ഈ വാർത്ത ശരിയല്ലെന്നും, ദയവായി വ്യാജ വാർത്തകൾ പ്രചരിപ്പിക്കരുത് എന്നും അദ്ദേഹം സോഷ്യൽ മീഡിയ പോസ്റ്റിലൂടെ അറിയിച്ചു. ശബരീഷ് വർമ്മ, റോണി ഡേവിഡ് രാജ്, അസീസ് നെടുമങ്ങാട്, വിജയരാഘവൻ, കിഷോർ, ശരത് സഭ, ശ്രീകുമാർ, ഷെബിൻ ബെൻസൺ, സജിൻ ചെറുക്കയിൽ, സണ്ണി വെയ്ൻ എന്നിവരാണ് കണ്ണൂർ സ്‌ക്വാഡിൽ മമ്മൂട്ടിക്കൊപ്പം അഭിനയിച്ചത്. സബ് ഇൻസ്‌പെക്ടർ ജോർജ് മാർട്ടിൻ എന്ന കഥാപാത്രമായാണ് മമ്മൂട്ടി ഈ ചിത്രത്തിൽ വേഷമിട്ടത്.
