വിക്രം എന്ന ചിത്രം മെഗാ വിജയം നേടുമ്പോൾ അതിന്റെ അണിയറയിൽ പ്രവർത്തിച്ച ഓരോരുത്തർക്കും സമ്മാനം നൽകുകയാണ് ചിത്രത്തിലെ നായകനും, രാജ് കമൽ ഫിലിംസ് ഇന്റർനാഷനലിന്റെ ബാനറിൽ ഈ ചിത്രം നിർമ്മിക്കുകയും ചെയ്ത ഉലക നായകൻ കമൽ ഹാസൻ. ഈ ചിത്രം മഹാവിജയമായതിലുള്ള തന്റെ സന്തോഷവും നന്ദിയും അദ്ദേഹം ചിത്രത്തിൽ ജോലി ചെയ്തവരോട് കാണിക്കുന്ന രീതി സോഷ്യൽ മീഡിയയിൽ വലിയ കയ്യടിയാണ് നേടിയെടുക്കുന്നത്. ചിത്രം സംവിധാനം ചെയ്ത ലോകേഷിന് രണ്ടര കോടിയുടെ ആഡംബര കാർ സമ്മാനമായി നൽകിയ കമൽ ഹാസൻ, ഈ ചിത്രത്തിൽ സംവിധാന സഹായികളായി ജോലി ചെയ്ത പതിമൂന്നു പേർക്ക് ഏറ്റവും പുത്തൻ മോഡൽ ബൈക്കുകളാണ് നൽകിയത്. ഇപ്പോഴിതാ, ഈ ചിത്രത്തിൽ അതിഥി വേഷത്തിലെത്തി വലിയ കയ്യടി നേടിയ നടിപ്പിൻ നായകൻ സൂര്യക്കും അദ്ദേഹമൊരു സമ്മാനം നല്കിയിരിക്കുകയാണ്. അതെന്താണെന്നുള്ളത് സൂര്യ തന്നെയാണ് പുറത്തു വിട്ടത്.
റോളക്സ് എന്ന വില്ലൻ കഥാപാത്രമായാണ് സൂര്യ ഈ ചിത്രത്തിലഭിനയിച്ചതു. അതിനു പകരം കമൽ ഹാസൻ സൂര്യക്ക് നൽകിയത്, ലോകത്തെ തന്നെ ഏറ്റവും വിലപിടിപ്പുള്ള വാച്ചുകളിലൊന്നായ റോളക്സ് വാച്ചാണ്. കമൽ ഹാസനിൽ നിന്ന് സമ്മാനം സ്വീകരിക്കുന്ന ചിത്രങ്ങളും സൂര്യ ട്വിറ്ററിൽ കൂടി പങ്കു വെച്ചിട്ടുണ്ട്. ഇനി വരാൻ പോകുന്ന വിക്രം 3 എന്ന ചിത്രത്തിൽ കമൽ ഹാസനൊപ്പം മുഴുനീള വേഷത്തിലാണ് സൂര്യ അഭിനയിക്കാൻ പോകുന്നതെന്നും കമൽ ഹാസൻ വെളിപ്പെടുത്തിയിരുന്നു. വിക്രത്തിൽ ഒരു രൂപ പോലും പ്രതിഫലം വാങ്ങാതെയാണ് സൂര്യ അഭിനയിച്ചതെന്നാണ് വാർത്തകൾ വന്നത്. തന്നോടുള്ള സ്നേഹം കൊണ്ടാണ് സൂര്യ വെറും മൂന്നര മിനിട്ടുള്ള ഈ കഥാപാത്രം ചെയ്യാൻ തയ്യാറായതെന്നും അതിനുള്ള നന്ദി തനിക്കു എപ്പോഴും അദ്ദേഹത്തോടുണ്ടാകുമെന്നും കമൽ ഹാസൻ പറഞ്ഞിരുന്നു. ഇപ്പോൾ ഇരുനൂറു കോടി ആഗോള ഗ്രോസ് നേടി കുതിക്കുകയാണ് വിക്രം.
A moment like this makes life beautiful! Thank you Anna for your #Rolex! @ikamalhaasan pic.twitter.com/uAfAM8bVkM
— Suriya Sivakumar (@Suriya_offl) June 8, 2022
