ടോവിനോ തോമസ് നായകനായെത്തുന്ന അജയന്റെ രണ്ടാം മോഷണം ഒരുങ്ങുന്നത് വമ്പൻ ഓവർസീസ് റിലീസിന്. ചിത്രത്തിലെ ഗൾഫിലെ ടിക്കറ്റ് ബുക്കിംഗ് അവിടെ പല സ്‌ക്രീനുകളിലും ആരംഭിച്ചു കഴിഞ്ഞു. ഹോം സ്ക്രീൻ എന്റർടൈൻമെന്റാണ് ഈ ചിത്രം ഗൾഫിൽ വിതരണം ചെയ്യുന്നത്. അമേരിക്കയിൽ പ്രൈം മീഡിയ, ഓസ്‌ട്രേലിയ/ ന്യൂസിലാൻഡിൽ വാൻഡർലസ്റ്റ്‌ ഫിലിംസ്, ബ്രിട്ടനിൽ സിനിമ ബോളിൻ, കാനഡയിൽ യോർക്ക് എന്നിവരാണ് ഈ ചിത്രം വിതരണം ചെയ്യുന്നത്.
വലിയ ഹൈപ്പിൽ എത്തുന്ന ഈ ആക്ഷൻ ചിത്രം ത്രീഡി ഫോർമാറ്റിൽ കൂടിയാണ് റിലീസ് ചെയ്യുന്നത്. മൂന്നു കാലഘട്ടങ്ങളിലൂടെ കഥ പറയുന്ന ഈ ചിത്രത്തിൽ അജയൻ, മണിയൻ, കുഞ്ഞിക്കേളു എന്നീ മൂന്നു കഥാപാത്രങ്ങൾക്കാണ് ടോവിനോ തോമസ് ജീവൻ പകരുന്നത്. പാൻ ഇന്ത്യൻ റിലീസായി മലയാളം, തമിഴ്, കന്നഡ, തെലുങ്ക്, ഹിന്ദി ഭാഷകളിലാണ് അജയന്റെ രണ്ടാം മോഷണം എത്തുന്നത്. തെലുങ്കിൽ മൈത്രി മൂവി മേക്കേഴ്‌സ് റിലീസ് ചെയ്യുന്ന ഈ ചിത്രം നോർത്ത് ഇന്ത്യയിൽ എ എ ഫിലിംസ് ആണ് റിലീസ് ചെയ്യുക.
കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്മി, ബേസിൽ ജോസഫ്, ജഗദീഷ്, ഹരീഷ് ഉത്തമൻ, ഹരീഷ് പേരടി, പ്രമോദ് ഷെട്ടി, രോഹിണി എന്നിവരും വേഷമിട്ട ഈ ചിത്രം സെപ്റ്റംബർ 12 – നാണ് ആഗോള റിലീസായി എത്തുന്നത്. ചിത്രത്തിന്റെ കേരളത്തിലെ അഡ്വാൻസ് ബുക്കിങ്ങും ഉടനെ ആരംഭിക്കും. മാജിക് ഫ്രെയിംസ്, യു.ജി.എം മോഷൻ പിക്ചേഴ്സ് എന്നീ ബാനറുകളിൽ ലിസ്റ്റിൻ സ്റ്റീഫൻ, ഡോ. സക്കറിയ തോമസ് എന്നിവർ ചേർന്നാണ് ഈ ചിത്രം നിർമ്മിച്ചത്.
