മലയാളത്തിലെ സൂപ്പർ ഹിറ്റ് സംവിധായകരിൽ ഒരാളാണ് അമൽ നീരദ്. തന്റെ സ്റ്റൈലിഷ് മേക്കിങ് ശൈലി കൊണ്ട് മലയാള സിനിമയുടെ യുവ പ്രേക്ഷകർക്കിടയിൽ ഒരു ബ്രാൻഡ് ആയി മാറാൻ സാധിച്ച ചുരുക്കം ചില സംവിധായകരിലൊരാളാണ് അമൽ നീരദ്. മമ്മൂട്ടി നായകനായ ബിഗ് ബി എന്ന ചിത്രമൊരുക്കി അരങ്ങേറ്റം കുറിച്ച അമൽ നീരദ്, അതിന് ശേഷം മോഹൻലാൽ നായകനായ സാഗർ ഏലിയാസ് ജാക്കി, ദുൽഖർ നായകനായ സി ഐ എ, ഫഹദ് ഫാസിൽ നായകനായ വരത്തൻ, പൃഥ്വിരാജ് നായകനായ അൻവർ, മൾട്ടി-സ്റ്റാർ ചിത്രമായ ഇയ്യോബിന്റെ പുസ്തകം, ബാച്ചിലർ പാർട്ടി തുടങ്ങിയവയും ഒരുക്കിയിട്ടുണ്ട്. മമ്മൂട്ടിയുടെ കരിയറിലെ ഏറ്റവും വലിയ വിജയമായ ഭീഷ്മ പർവമാണ് അമൽ നീരദ് സംവിധാനം ചെയ്ത് അവസാനം റിലീസ് ചെയ്ത് ചിത്രം. അമൽ നീരദ്- മമ്മൂട്ടി ടീമിന്റെ ബിലാൽ എന്ന ബിഗ് ബി രണ്ടാം ഭാഗത്തിനും പ്രേക്ഷകർ കാത്തിരിക്കുകയാണ്.
എന്നാൽ ഇപ്പോൾ സോഷ്യൽ മീഡിയയിൽ പ്രചരിക്കുന്ന വാർത്തകൾ പ്രകാരം, ബിലാലിന് മുൻപ് അമൽ നീരദ് മറ്റൊരു വലിയ ചിത്രമൊരുക്കാനുള്ള തയ്യാറെടുപ്പിലാണ്. ആരായിരിക്കും ഇതിലെ നായകനെന്നറിയാനുള്ള ആകാംക്ഷയിലാണ് പ്രേക്ഷകർ. മമ്മൂട്ടി, മോഹൻലാൽ, ദുൽഖർ സൽമാൻ, ഫഹദ് ഫാസിൽ എന്നിവരുടെയൊക്കെ പേരുകൾ ആരാധകർ ചർച്ച ചെയ്യുന്നുണ്ടെങ്കിലും, ഏറ്റവും ശ്കതമായി ഈ അമൽ നീരദ് ചിത്രവുമായി ബന്ധപ്പെട്ട് പറഞ്ഞു കേൾക്കുന്നത് കുഞ്ചാക്കോ ബോബന്റെ പേരാണ്. ടോവിനോ തോമസും ഇതിലുണ്ടാകുമെന്നുള്ള റിപ്പോർട്ടുകളും പ്രചരിക്കുന്നുണ്ട്. ഏതായാലും ഉടൻ പ്രഖ്യാപിക്കാൻ സാധ്യതയുള്ള ഈ ചിത്രത്തിന്റെ ഷൂട്ടിംഗ്, നവംബർ മാസത്തിലാരംഭിക്കുമെന്നാണ് സൂചന.
