ഫഹദ് ഫാസിലിനെ നായകനാക്കി ജിത്തു മാധവൻ ഒരുക്കിയ ബ്ലോക്ക്ബസ്റ്റർ ചിത്രമായ ആവേശം ഈ വർഷമാണ് പ്രേക്ഷകരുടെ മുന്നിലെത്തിയത്. നൂറു കോടി ക്ലബിൽ ഇടം പിടിച്ച ഈ ചിത്രത്തിലെ രംഗ എന്ന കഥാപാത്രമായി നടത്തിയ ഗംഭീര പ്രകടനം ഫഹദിന് വലിയ കയ്യടിയാണ് നേടിക്കൊടുത്തത്. ഫഹദ് ഫാസിലും അൻവർ റഷീദും ചേർന്നാണ് ഈ ഗ്യാങ്സ്റ്റർ കോമഡി ചിത്രം നിർമ്മിച്ചത്.
ഇപ്പോഴിതാ ഇതിന്റെ തെലുങ്ക് റീമേക്ക് അവകാശം വിറ്റു പോയിരിക്കുകയാണ്. തെലുങ്ക് സൂപ്പർതാരം നന്ദമൂരി ബാലകൃഷ്ണ എന്ന ബാലയ്യ ഈ ചിത്രം റീമേക്ക് ചെയ്യുമെന്നായിരുന്നു ആദ്യം വന്ന വാർത്തകൾ പറഞ്ഞത്. എന്നാൽ ഏറ്റവും പുതിയ റിപ്പോർട്ടുകൾ പ്രകാരം ചിത്രത്തിൻെറ റീമേക് അവകാശം വാങ്ങിയത് തെലുങ്കിലെ മറ്റൊരു വമ്പൻ താരമായ രവി തേജയാണ്.
രവി തേജ തന്നെ ഈ റീമേക്കിൽ പ്രധാന വേഷം ചെയ്യുമോ എന്നുള്ള കാര്യത്തിൽ ഉറപ്പ് വന്നിട്ടില്ലെങ്കിലും അദ്ദേഹത്തിന്റെ കമ്പനി ആയിരിക്കുക ഈ ചിത്രം റീമേക്ക് ചെയ്യുക എന്ന് ഉറപ്പായിക്കഴിഞ്ഞു. ഗ്രേപ്പ് വൈനിനെ ഉദ്ധരിച്ച് ഒടിടി പ്ലേ ആണ് ഈ വാർത്ത പുറത്ത് വിട്ടത്. സുഷിൻ ശ്യാം സംഗീതം നൽകിയ ആവേശത്തിലെ ഗാനങ്ങൾ എല്ലാം സൂപ്പർ ഹിറ്റായിരുന്നു.
അതിലെ ഇല്ലുമിനാട്ടി എന്ന ഗാനം മലയാളത്തിൽ നിന്ന് ആദ്യമായി യൂട്യൂബിൽ 200 മില്യൺ കാഴ്ചക്കാരെ നേടിയ ഗാനമായും മാറിയിരുന്നു. സജിൻ ഗോപു, റോഷൻ, ഹിപ്സ്റ്റർ, മിഥുൻ ജെഎസ്, പൂജ മോഹൻരാജ്, നീരജ രാജേന്ദ്രൻ, ശ്രീജിത്ത് നായർ, തങ്കം മോഹൻ എന്നിവരും ഇതിന്റെ താരനിരയിലുണ്ടായിരുന്നു.
