ആക്ഷൻ സൂപ്പർ സ്റ്റാർ സുരേഷ് ഗോപി നായകനായി എത്തിയ പാപ്പൻ ജൂലൈ 29നാണ് റിലീസ് ചെയ്തത്. മാസ്റ്റർ ഡയറക്ടർ ജോഷി സംവിധാനം ചെയ്ത ഈ മാസ്സ് ക്രൈം ത്രില്ലർ ചിത്രത്തിന് ഗംഭീര പ്രേക്ഷക- നിരൂപക പ്രതികരണമാണ് ലഭിച്ചത്. ആർ ജെ ഷാൻ രചിച്ച ഈ ചിത്രം ബോക്‌സ് ഓഫീസിലും മികച്ച പ്രകടനം നടത്തിക്കൊണ്ട് സുരേഷ് ഗോപിയുടെ കരിയറിലെ തന്നെ ഏറ്റവും വലിയ സോളോ ഹിറ്റായി മാറുകയും ചെയ്തു. ഇപ്പോഴിതാ റിലീസ് ചെയ്ത് മൂന്നു വാരങ്ങൾ പിന്നിടുമ്പോൾ ഈ ചിത്രം 50 കോടിയോളം രൂപയാണ് ഗ്രോസ് നേടിയതെന്ന് പുറത്ത് വിട്ടിരിക്കുകയാണ് ചിത്രത്തിന്റെ അണിയറ പ്രവർത്തകർ. സുരേഷ് ഗോപിയുടെ കരിയറിലെ ആദ്യ അൻപത് കോടി ചിത്രമാണ് പാപ്പൻ.
ഡേവിഡ് കാച്ചപ്പിള്ളി പ്രൊഡക്ഷൻസിന്റെയും ഇഫാർ മീഡിയയുടെയും, ശ്രീ ഗോകുലം മൂവീസിന്റെയും ബാനറിൽ യഥാക്രമം ഡേവിഡ് കാച്ചപ്പിള്ളിയും റാഫി മതിരയും ഗോകുലം ഗോപാലനും ചേർന്ന് നിർമ്മിച്ച ഈ ചിത്രത്തിൽ എബ്രഹാം മാത്യു മാത്തൻ എന്ന റിട്ടയേർഡ് പൊലീസ് ഓഫീസർ ആയാണ് സുരേഷ് ഗോപി അഭിനയിച്ചത്. നൈല ഉഷ, നീത പിള്ളൈ, ഗോകുൽ സുരേഷ് ഗോപി, ആശ ശരത്, കനിഹ, മാളവിക മേനോൻ, വിജയ രാഘവൻ, ടിനി ടോം, ഷമ്മി തിലകൻ, ശ്രീജിത്ത് രവി, മാല പാർവതി, സാധിക വേണുഗോപാൽ, അഭിഷേക് രവീന്ദ്രൻ, ചന്ദുനാഥ്, ഡയാന ഹമീദ്, ജുവൽ മേരി, അജ്മൽ അമീർ എന്നിവരും ഇതിന്റെ താരനിരയിലുണ്ട്. ജെക്‌സ് ബിജോയ് സംഗീതമൊരുക്കിയ ഈ ചിത്രത്തിന് ക്യാമറ ചലിപ്പിച്ചത് അജയ് ഡേവിഡ് കാച്ചപ്പിള്ളി, എഡിറ്റ് ചെയ്തത് ശ്യാം ശശിധരൻ എന്നിവരാണ്.
