സ്വാതന്ത്ര്യം അർദ്ധരാത്രിയിൽ എന്ന ചിത്രത്തിന് ശേഷം ടിനു പാപ്പച്ചൻ ഒരുക്കിയ അജഗജാന്തരം എന്ന ചിത്രം ഇപ്പോൾ തീയേറ്ററുകളിൽ മികച്ച വിജയം നേടി മുന്നേറുകയാണ്. ക്രിസ്മസ് റിലീസുകളിൽ ഏറ്റവും വലിയ വിജയമാണ് ഈ ചിത്രം നേടിക്കൊണ്ടിരിക്കുന്നതു. ആദ്യ ഷോ മുതൽ ഗംഭീര പ്രേക്ഷക പ്രതികരണം നേടിയ ഈ ചിത്രം യുവ പ്രേക്ഷകരുടെ പിന്തുണയോടെയാണ് മുന്നേറ്റം നടത്തുന്നത്. ആദ്യാവസാനം ഒരു പക്കാ അടിപ്പടം ആയി ഒരുക്കിയ ഈ ചിത്രം ഇതിലെ സംഘട്ടന രംഗങ്ങളിലെ മികവ് കൊണ്ടാണ് ഏറെ കയ്യടി നേടിയെടുക്കുന്നത്. ടിനു പാപ്പച്ചന്റെ മേക്കിങ്ങും, ആന്റണി വർഗീസ്, അർജുൻ അശോകൻ, കിച്ചു ടെല്ലസ് എന്നിവരുടെ സംഘട്ടനവും പ്രേക്ഷകരെ ത്രസിപ്പിക്കുകയാണ്. ഇപ്പോഴിതാ ഈ ചിത്രത്തിന്റെ മേക്കിങ് വീഡിയോ കൂടി പുറത്തു വാനിരിക്കുകയാണ്. ഈ ചിത്രത്തിലെ കിടിലൻ സീനുകൾ എങ്ങനെയാണു ഒരുക്കിയത് എന്നാണ് ഈ മേക്കിങ് വീഡിയോയിൽ കൂടി കാണിച്ചു തരുന്നത്.
മുകളിൽ പറഞ്ഞവരെ കൂടാതെ ലുക്മാൻ, സുധി കോപ്പ, വിനീത് വിശ്വം, സാബു മോൻ, ജാഫർ ഇടുക്കി, രാജേഷ് ശർമ, ടിറ്റോ വിൽസൺ, ബിട്ടോ ഡേവിസ് സിനോജ് വർഗീസ് എന്നിവരും അഭിനയിക്കുന്ന ഈ ചിത്രം സിൽവർ ബേ പ്രൊഡക്ഷൻസിന്റെ ബാനറിൽ എമ്മാനുവൽ ജോസഫും അജിത് തലാപ്പിള്ളിയും ചേർന്നാണ് നിർമ്മിച്ചിരിക്കുന്നത്. ആദ്യാവസാനം ഒരു ഉത്സവത്തിന്റെ പശ്ചാത്തലത്തിൽ ഒരുങ്ങിയിരിക്കുന്ന ആദ്യ മലയാള ചിത്രമായ അജഗജാന്തരം രചിച്ചിരിക്കുന്നത് കിച്ചു ടെല്ലസ്, വിനീത് വിശ്വം എന്നിവർ ചേർന്നാണ്. ഈ ചിത്രത്തിന് ക്യാമറ ചലിപ്പിച്ചത് ജിന്റോ ജോർജ്, സംഗീതമൊരുക്കിയത് ജസ്റ്റിൻ വർഗീസ്, എഡിറ്റ് ചെയ്തത് ഷമീർ മുഹമ്മദ് എന്നിവരാണ്.
