മലയാളത്തിലെ സൂപ്പർ ഹിറ്റ് ചിത്രമായ അയ്യപ്പനും കോശിയും തെലുങ്കിലേക്ക് റീമേക്ക് ചെയ്യുകയാണ് ഇപ്പോൾ. അന്തരിച്ചു പോയ സംവിധായകൻ സച്ചി രചിച്ചു സംവിധാനം ചെയ്ത ഈ ചിത്രത്തിൽ അയ്യപ്പൻ നായർ ആയി ബിജു മേനോനും കോശി കുര്യൻ ആയി പൃഥ്വിരാജ് സുകുമാരനും ആണ് എത്തിയത്. ഇപ്പോഴിതാ ഈ ചിത്രത്തിന്റെ തെലുങ്കു റീമേക്കിൽ ആ വേഷങ്ങൾ ചെയ്യുന്നത് തെലുങ്കു സൂപ്പർ താരം പവൻ കല്യാണും റാണ ദഗ്ഗുബതിയും ആണ്. ഈ ചിത്രത്തിന്റെ ഒരു മേക്കിങ് വീഡിയോയും അതുപോലെ പവൻ കല്യാൺ അവതരിപ്പിക്കുന്ന കഥാപാത്രത്തെ കാണിച്ചു തരുന്ന ഒരു ടീസറും ഇതിനോടകം പുറത്തു വന്നിട്ടുണ്ട്. ഇപ്പോഴിതാ തെലുങ്കിലെ അയ്യപ്പൻ നായർ അഥവാ ഭീംല നായക് ആയ പവൻ കല്യാൺ മെഷിൻ ഗണ്ണുമായി തുടരെ തുടരെ വെടിവയ്ക്കുന്ന രംഗമാണ് സോഷ്യൽ മീഡിയയിൽ വൈറലാവുന്നതു.
മലയാളത്തിൽ വളരെ റിയലിസ്റ്റിക് ആയി ഒരുക്കിയ ഈ മാസ്സ് ചിത്രം, തെലുങ്കിൽ പക്കാ മാസ്സ് മസാല എന്റെർറ്റൈനെർ ആയാണ് ഒരുക്കുന്നത് എന്നാണ് സൂചന. പവൻ കല്യാൺ ആരാധകർക്ക് വേണ്ടിയാണു അവർ ഈ ചിത്രം മാറ്റി മറിക്കുന്നത് എന്നും റിപ്പോർട്ടുകൾ പറയുന്നു. സാഗർ ചന്ദ്ര സംവിധാനം ചെയ്യുന്ന ഈ റീമേക്കിൽ തമിഴ് നടി ഐശ്വര്യ രാജേഷ് ആണ് നായികാ വേഷം ചെയുന്നത്. ത്രിവിക്രം ശ്രീനിവാസാണ് ഈ ചിത്രത്തിന് വേണ്ടി തെലുങ്കിൽ സംഭാഷണം രചിച്ചിരിക്കുന്നത്. എസ് തമൻ ആണ് ഈ ചിത്രത്തിന് വേണ്ടി സംഗീത സംവിധാനം നിർവഹിക്കുന്നത് എന്ന് മാത്രമല്ല ഇതിന്റെ ടീസറിന് വേണ്ടി അദ്ദേഹം ഒരുക്കിയ സംഗീതം സൂപ്പർ ഹിറ്റുമായി കഴിഞ്ഞു. നിത്യ മേനോനും ഈ ചിത്രത്തിലെ മറ്റൊരു പ്രധാന വേഷം ചെയ്യുന്നുണ്ട്.
