വിസ്മയ വിജയം നേടി മലയാള സിനിമയുടെ വിപണന സമവാക്യങ്ങളെ പുതിയ ദിശയിലേക്കു തിരിച്ചു വിട്ട ചിത്രമാണ് ജീത്തു ജോസഫ് – മോഹൻലാൽ ടീം ആദ്യമായി ഒന്നിച്ചപ്പോൾ സംഭവിച്ച ദൃശ്യം. ഇപ്പോഴിതാ ആ ബ്ലോക്ക്ബസ്റ്റർ കൂട്ടുകെട്ട് വീണ്ടും ഒന്നിക്കുന്ന റാം എന്ന ചിത്രത്തിന്റെ ഷൂട്ടിംഗ് ആരംഭിച്ചു കഴിഞ്ഞു. റാം എന്ന ടൈറ്റിൽ വേഷത്തിൽ മോഹൻലാൽ എത്തുന്ന ഈ ചിത്രം ഒരു റിയലിസ്റ്റിക് ആക്ഷൻ ത്രില്ലർ ആയാണ് ഒരുക്കുന്നത് എന്നാണ് സൂചന. വമ്പൻ ബഡ്ജറ്റിൽ ഒരുക്കുന്ന ഈ ചിത്രത്തിന്റെ ലൊക്കേഷൻ സ്റ്റില്ലുകൾ ആണ് ഇപ്പോൾ സോഷ്യൽ മീഡിയയിൽ ഏറെ ശ്രദ്ധ നേടുന്നത്. കിടിലൻ ഗെറ്റപ്പിൽ ഉള്ള മോഹൻലാലിന്റെ സ്റ്റില്ലുകൾ ആണ് ഇപ്പോൾ പുറത്തു വന്നിരിക്കുന്നത്. മോഹൻലാലിനെ നമ്മൾ ഇതുവരെ കാണാത്ത സ്റ്റൈലൻ ഗെറ്റപ്പിൽ ആണ് ഈ ചിത്രങ്ങളിൽ കാണാൻ സാധിക്കുന്നത്.
അഭിഷേക് ഫിലിംസ് നിർമ്മിക്കുന്ന ഈ ചിത്രത്തിൽ വമ്പൻ താര നിര തന്നെ അണിനിരക്കുന്നുണ്ട്. തെന്നിന്ത്യൻ താര സുന്ദരി തൃഷ ആദ്യമായി മോഹൻലാലിന്റെ നായികാ വേഷം ചെയ്യുന്ന ഈ ചിത്രത്തിൽ ഇന്ദ്രജിത് സുകുമാരൻ, ആദിൽ ഹുസൈൻ, കലാഭവൻ ഷാജോൺ, സിദ്ദിഖ്, സായി കുമാർ, ലിയോണ ലിഷോയ് തുടങ്ങി ഒട്ടേറെ താരങ്ങൾ അഭിനയിക്കുന്നുണ്ട്. ജീത്തു ജോസഫ് തന്നെ രചനയും നിർവഹിച്ച ഈ ചിത്രം ഈ വർഷം തന്നെ റിലീസ് ചെയ്യാൻ ആണ് പ്ലാൻ. ഒറ്റ ഷെഡ്യൂളിൽ തീർക്കാൻ പോകുന്ന ഈ സിനിമയുടെ ചിത്രീകരണം കൂടുതലും കേരളത്തിന് പുറത്തും വിദേശ രാജ്യങ്ങളിലും ആയിരിക്കും. ജീത്തു ജോസഫിന്റെ കരിയറിലെ തന്നെ ഏറ്റവും വലിയ ചിത്രമാണ് റാം.
