ജനപ്രിയ നായകൻ ദിലീപ് നായക വേഷം ചെയുന്ന പുതിയ ചിത്രം പ്രഖ്യാപിച്ചു. റാഫി വീണ്ടും ദിലീപിനൊപ്പം എത്തുന്ന ഈ ചിത്രത്തിന്റെ പേര് വോയ്സ് ഓഫ് സത്യനാഥൻ എന്നാണ്. പഞ്ചാബി ഹൗസ്, പാണ്ടിപ്പട, ചൈനാടൗൺ, തെങ്കാശിപ്പട്ടണം, റിങ്ങ്മാസ്റ്റർ എന്നീ ഹിറ്റ് ചിത്രങ്ങൾക്ക് ശേഷം ദിലീപും റാഫിയും വീണ്ടും ഒന്നിക്കുന്നുവെന്നതാണ് ഈ ചിത്രത്തിന്റെ ഏറ്റവും വലിയ പ്രത്യേകത. ബാദുഷ സിനിമാസിന്റേയും ഗ്രാന്റ് പ്രൊഡക്‌ഷന്‍സിന്റേയും ബാനറിൽ എൻ.എം. ബാദുഷ, ഷിനോയ് മാത്യു, ദിലീപ്, പ്രിജിൻ ജെ.പി. എന്നിവർ ചേർന്നാണ് ചിത്രം നിർമിക്കുന്നത്. ദിലീപിനൊപ്പം ഒരു വലിയ താരനിര തന്നെ ഈ ചിത്രത്തിൽ അണിനിരക്കുന്നുണ്ട്.
ഈ ചിത്രത്തിന്റെ കഥ തിരക്കഥ സംഭാഷണം സംവിധാനം എന്നിവ നിർവഹിക്കുന്നത് സംവിധായകൻ റാഫി തന്നെയാണ്. ജോജു ജോർജ്, സിദ്ധിഖ്, ജോണി ആന്റണി, വീണ നന്ദകുമാർ തുടങ്ങിയവരും ഇതിൽ ദിലീപിനൊപ്പം പ്രധാന കഥാപാത്രങ്ങളായി എത്തുന്നു. ഈ ചിത്രത്തിന് വേണ്ടി ക്യാമറ ചലിപ്പിക്കുന്നത് ജിതിൻ സ്റ്റാനിലസ് ആണെങ്കിൽ, ഇതിനു വേണ്ടി സംഗീത സംവിധാനം നിർവഹിക്കുന്നത് ജസ്റ്റിൻ വർഗീസ്‌ ആണ്. ഷമീർ മുഹമ്മദ് ആണ് വോയ്സ് ഓഫ് സത്യനാഥൻ എഡിറ്റ് ചെയ്യുന്നത്. ഈ ചിത്രത്തിന്റെ ടൈറ്റിൽ പോസ്റ്റർ പങ്കു വെച്ചു കൊണ്ട് നിർമ്മാതാവ് ബാദുഷ ഫേസ്ബുക്കിൽ കുറിച്ചത് ഇങ്ങനെ, ദീർഘകാലത്തെ ആഗ്രഹത്തിനും ശ്രമത്തിനും സാക്ഷാത്കാരം, ബാദുഷ സിനിമാസ് ഉദിക്കുകയാണ്. ആദ്യ സിനിമ വോയ്സ് ഓഫ് സത്യനാഥൻ – ബാദുഷ സിനിമാസിൻ്റെ ആദ്യ നിർമാണ സംരംഭം. ഒപ്പം പ്രിയപ്പെട്ട ദിലീപേട്ടൻ്റെ ഗ്രാൻഡ് പ്രൊഡക്ഷൻസുമുണ്ട്, സുഹൃത്തുക്കളായ ഷിനോയ് മാത്യുവും പ്രിജിൻ ജെ.പി.യുമുണ്ട്.
റാഫിയാണ് കഥ, തിരക്കഥ, സംഭാഷണം, സംവിധാനം. ദിലീപ് മുഖ്യവേഷത്തിലെത്തുന്ന സിനിമയിൽ ജോജു ജോർജും ഒരു പ്രധാന കഥാപാത്രത്തെ അവതരിപ്പിക്കുന്നു.
