തെലുങ്ക് സൂപ്പർ താരം നാഗാര്‍ജുന നായകനാകുന്ന പുതിയ ചിത്രമാണ് ദി ഗോസ്റ്റ്. പ്രവീണ്‍ സട്ടരു ആണ് ഈ ചിത്രം സംവിധാനം ചെയ്തിരിക്കുന്നത്. സംവിധായകൻ തന്നെ തിരക്കഥയും രചിച്ച ഈ ചിത്രം ബിഗ് ബഡ്ജറ്റിലൊരുക്കിയ ആക്ഷൻ ത്രില്ലറാണെന്നു ഇതിന്റെ ടീസർ നമ്മുക്ക് കാണിച്ചു തരുന്നു. ഇപ്പോഴിതാ ഈ ചിത്രത്തിലെ ഒരു പ്രണയ ഗാനത്തിന്റെ പ്രോമോ വീഡിയോ പുറത്തു വന്നിരിക്കുകയാണ്. നാളെ റിലീസ് ചെയ്യാൻ പോകുന്ന വേഗം എന്ന ഗാനത്തിന്റെ പ്രോമോ വീഡിയോയാണ് അണിയറ പ്രവർത്തകർ പുറത്തു വിട്ടിരിക്കുന്നത്. നാഗാർജുനയുടേയും നായികയായ സോണൽ ചൗഹാന്റേയും പ്രണയ രംഗങ്ങളാണ് ഈ ഗാനത്തിന്റെ ഹൈലൈറ്റ്. അതീവ ഗ്ലാമറസ്സായാണ് സോണൽ ചൗഹാൻ ഈ ഗാനത്തിൽ പ്രത്യക്ഷപ്പെടുന്നതെന്ന് ഈ പ്രോമോ വീഡിയോ നമ്മുക്ക് കാണിച്ചു തരുന്നുണ്ട്. കൃഷ്ണ മദിനേനി വരികൾ രചിച്ച ഈ ഗാനം ആലപിച്ചിരിക്കുന്നത് കപിൽ കപിലൻ, രമ്യ ബെഹ്റ എന്നിവരാണ്.
ഭരത്- സൗരഭ്‌ ടീം സംഗീത സംവിധാനം നിർവഹിച്ചിരിക്കുന്ന ഈ ഗാനത്തിന് നൃത്ത സംവിധാനം നിർവഹിച്ചത് സീസറാണ്. മലയാളി താരം അനിഖ സുരേന്ദ്രൻ, ഗുല്‍ പനാഗ്, മനീഷ് ചൗധരി, രവി വര്‍മ, ശ്രീകാന്ത് അയ്യങ്കാര്‍, വൈഷ്‍ണവി ഗനത്ര എന്നിവരും വേഷമിട്ട ഈ ചിത്രം നിർമ്മിച്ചിരിക്കുന്നത് ശ്രീ വെങ്കിടേശ്വര സിനിമാസ്, നോർത്ത് സ്റ്റാർ എന്റർടൈൻമെന്റ് എന്നിവയുടെ ബാനറിൽ സുനിൽ നാരംഗ്, പുസ്ക്ർ റാം മോഹൻ റാവു, ശരത് മാരാർ എന്നിവർ ചേർന്നാണ്. മുകേഷ് ജി ക്യാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് ധര്‍മേന്ദ്രയാണ്. വിക്രം ഗാന്ധിയെന്ന കഥാപാത്രമായാണ് നാഗാര്‍ജുന ഇതിലഭിനയിച്ചിരിക്കുന്നത്.
