ബോളിവുഡ് യുവതാരം വരുൺ ധവാൻ നായകനായി എത്തുന്ന ഏറ്റവും പുതിയ ചിത്രമാണ് ഭേഡിയ. അമർ കൗശിക് സംവിധാനം ചെയ്തിരിക്കുന്ന ഈ ഹൊറർ- മിസ്റ്ററി കോമഡി ത്രില്ലർ ചിത്രത്തിന്റെ ട്രൈലെർ വലിയ ശ്രദ്ധയാണ് നേടിയത്. ഇപ്പോഴിതാ ഇതിലെ ഒരു ഗാനമാണ് സൂപ്പർ ഹിറ്റാവുന്നത്. ചിത്രത്തിലെ നായികാ വേഷം ചെയ്യുന്ന കൃതി സനോണിന്റെ ഗ്ലാമർ പ്രദർശനവും സ്റ്റൈലിഷ് നൃത്തവുമാണ് ഈ ഗാനത്തിന്റെ ഹൈലൈറ്റ്. കൃതിക്ക് ഒപ്പം അതിഥി വേഷത്തിൽ ശ്രദ്ധ കപൂറും ഈ ഗാന രംഗത്തിൽ ഗ്ലാമറസായി പ്രത്യക്ഷപ്പെടുന്നുണ്ട്. തുംകേശ്വരി എന്ന വരികളോടെ തുടങ്ങുന്ന ഈ ഗാനം രചിച്ചത് അമിതാബ് ഭട്ടാചാര്യയും, ഇതിന് ഈണം പകർന്നത് സച്ചിൻ- ജിഗർ ടീമുമാണ്. സച്ചിൻ- ജിഗർ, രശ്മീത് കൗർ, ആഷ് കിംഗ്, ദിവ്യ കുമാർ എന്നിവർ ചേർന്നാണ് ഈ ഗാനം ആലപിച്ചിരിക്കുന്നത്. സീ മ്യൂസിക് കമ്പനിയുടെ യൂട്യൂബ് ചാനലിൽ റിലീസ് ചെയ്തിരിക്കുന്ന ഈ ഗാനത്തിന് ഇതിനോടകം രണ്ട് കോടിയിലധികം കാഴ്ചക്കാരെയാണ് ലഭിച്ചിരിക്കുന്നത്.
ഗണേഷ് ആചാര്യയാണ് ഈ ഗാനത്തിന് നൃത്ത സംവിധാനം നിർവഹിച്ചിരിക്കുന്നത്. ദീപക് ഡോബ്രിയൽ, അഭിഷേക് ബാനർജി, പാലിൻ കബക് എന്നിവരും അഭിനയിച്ചിരിക്കുന്ന ഈ ചിത്രം സംവിധാനം ചെയ്തത് അമർ കൗശിക് ആണ്. നിരന് ഭട്ട് തിരക്കഥ രചിച്ചിരികുന്ന ഈ ചിത്രം ദിനേശ് വിജൻ ആണ് നിർമ്മിച്ചിരിക്കുന്നത്. അദ്ദേഹവും ജിയോ സ്റ്റുഡിയോയും ചേർന്നാണ് ഈ ചിത്രം അവതരിപ്പിച്ചിരിക്കുന്നത്. ഇന്ത്യൻ സിനിമയിലെ ആദ്യത്തെ ക്രീച്ചർ കോമഡി എന്നാണ് ഈ ചിത്രത്തെ അണിയറ പ്രവർത്തകർ വിശേഷിപ്പിക്കുന്നത്. ഒരു ചെന്നായയുടെ കടിയേൽക്കുന്ന ചെറുപ്പക്കാരൻ രാത്രിയിൽ ചെന്നായയായി മാറുന്നതാണ് ഇതിന്റെ ഇതിവൃത്തം. ജിഷ്ണു ഭട്ടാചാർജി ക്യാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് സംയുക്ത കാസ ആണ്.
