തെലുങ്കിലെ സ്റ്റൈലിഷ് സ്റ്റാർ അല്ലു അർജുൻ പ്രത്യക്ഷപ്പെട്ട ഒരു മ്യൂസിക് വീഡിയോ ഇപ്പോൾ സോഷ്യൽ മീഡിയയിൽ തരംഗമായി മാറുകയാണ്. കോക്ക് സ്റ്റുഡിയോയുടെ യൂട്യൂബ് ചാനലിൽ റിലീസ് ചെയ്ത ഈ ഗാനത്തിൽ കിടിലൻ നൃത്ത ചുവടുകളുമായി അല്ലു അർജുൻ നിറഞ്ഞു നിൽക്കുന്ന കാഴ്ചയാണ് കാണാൻ സാധിക്കുന്നത്. പ്രശസ്ത ബോളിവുഡ് ഗായകൻ അർമാൻ മാലിക് ആലപിച്ച ഈ ഗാന രംഗത്തിൽ അല്ലു അർജുനൊപ്പം ട്രൈബ് ടീമും ലോസ്റ്റ് സ്റ്റോറീസ് ടീമുമുണ്ട്. അർമാൻ മാലിക്കും ഈ ഗാന രംഗത്തിൽ അഭിനയിച്ചിട്ടുണ്ട്. മേമു ആഗമു എന്ന വരികളോടെ തുടങ്ങുന്ന ഈ സ്റ്റൈലിഷ് ഗാനം രചിച്ചത് കുനാൽ വർമ്മ, എല്ലി, എസ് ടൈഗർ എന്നിവർ ചേർന്നാണ്. ലോസ്റ്റ് സ്റ്റോറീസ് ടീം, എല്ലി എന്നിവർ ചേർന്നാണ് ഈ ഗാനത്തിന് ഈണം പകർന്നിരിക്കുന്നത്. കോളിൻ ഡികുന്നയാണ് ഈ മ്യൂസിക് വീഡിയോ സംവിധാനം ചെയ്തിരിക്കുന്നത്.
സ്റ്റൈലിഷ് ലുക്കിൽ അല്ലു അർജുൻ എത്തിയിരിക്കുന്ന ഈ വീഡിയോ നിർമ്മിച്ചിരിക്കുന്നത് ധർമ്മ പ്രൊഡക്ഷൻസിന്റെ ബാനറിൽ കരൺ ജോഹർ, പുനീത് മൽഹോത്ര എന്നിവരാണ്. രജിത് ദേവ് നൃത്ത സംവിധാനം നിർവഹിച്ചിരിക്കുന്ന ഈ വീഡിയോക്ക് വേണ്ടി ക്യാമറ ചലിപ്പിച്ചത് തൃണനോൻ സംരെജ് ആണ്. അർമാൻ മാലിക്, ലോസ്റ്റ് സ്റ്റോറീസ് എന്നിവർ ഒന്നിച്ച ഈ ഗാനം ഇപ്പോൾ പ്രേക്ഷകർക്കിടയിൽ ട്രെൻഡായി കഴിഞ്ഞു. പാൻ ഇന്ത്യൻ സൂപ്പർ താരമെന്ന നിലയിൽ ശ്രദ്ധ നേടുന്ന അല്ലു അർജുന്റെ സാന്നിധ്യവും ഈ മ്യൂസിക് വീഡിയോക്ക് വലിയ നേട്ടമാണ് സമ്മാനിക്കുന്നത്. സുകുമാർ ഒരുക്കിയ പുഷ്പ എന്ന ചിത്രത്തിലൂടെ പാൻ ഇന്ത്യ തലത്തിൽ വലിയ ആരാധകവൃന്ദവും സ്വീകാര്യതയുമാണ് അല്ലു അർജുൻ നേടിയത്.
