ബോളിവുഡ് കിംഗ്‌ ഖാൻ ഷാരൂഖ് ഖാൻ നായകനായി എത്തുന്ന ഏറ്റവും പുതിയ ചിത്രമായ പത്താൻ ജനുവരി 25 ന് റീലീസ് ചെയ്യാൻ പോവുകയാണ്. വാർ എന്ന സൂപ്പർ മെഗാഹിറ്റ് ഹൃത്വിക് റോഷൻ- ടൈഗർ ഷെറോഫ് ചിത്രത്തിന് ശേഷം സിദ്ധാർഥ് ആനന്ദ് ഒരുക്കുന്ന ഈ മെഗാ മാസ്സ് ആക്ഷൻ ത്രില്ലർ ചിത്രം നിർമ്മിക്കുന്നത് യാഷ് രാജ് ഫിലിംസ് ആണ്. യാഷ് ഫിലിംസിന്റെ അൻപതാം ചിത്രം കൂടിയായ പത്താന്റെ ടീസർ നേരത്തെ റിലീസ് ചെയ്യുകയും സൂപ്പർ ഹിറ്റാവുകയും ചെയ്തിരുന്നു. മാത്രമല്ല, ഇതിലെ ബേഷരം രംഗ് എന്ന ഗാനത്തിന്റെ വീഡിയോ, അതിലെ നായികയുടെ വസ്ത്രത്തിന്റെ നിറത്തിന്റെ പേരിൽ വലിയ പ്രതിഷേധങ്ങൾക്കും ഇടയാക്കിയിരുന്നു. ഏതായാലും ആ പ്രതിഷേധങ്ങളെയെല്ലാം കാറ്റിൽ പറത്തിക്കൊണ്ട് റിലീസിന് തയ്യാറെടുക്കുന്ന ഈ ചിത്രത്തിന്റെ ട്രൈലെർ ഇന്ന് റിലീസ് ചെയ്തിരിക്കുകയാണ്. ഷാരൂഖ് ഖാന്റെ കരിയറിലെ ഏറ്റവും വലിയ ആക്ഷൻ ചിത്രമായി വരുന്ന പത്താൻ വെള്ളിത്തിരയിലും ഗംഭീര ആക്ഷന്റെ തീ പടർത്തുമെന്ന സൂചനയാണ് ഈ ട്രൈലെർ നമ്മുക്ക് നൽകുന്നത്.
സൂപ്പർ താരം ജോൺ എബ്രഹാം വില്ലൻ വേഷം ചെയ്തിരിക്കുന്ന ഈ ചിത്രത്തിലെ നായികാ വേഷം ചെയ്തിരിക്കുന്നത് ദീപിക പദുക്കോൺ ആണ്. ഇവരെ കൂടാതെ മെഗാസ്റ്റാർ സൽമാൻ ഖാൻ ഇതി അതിഥി വേഷത്തിലും എത്തുന്നുണ്ട്. തന്റെ സൂപ്പർഹിറ്റ് സ്പൈ കഥാപാത്രമായ ടൈഗർ ആയാണ് ഇതിൽ സൽമാൻ എത്തുന്നത്. യാഷ് രാജ് ആരംഭിക്കുന്ന സ്പൈ യൂണിവേഴ്സിന്റെ ഭാഗമായാണ് ഈ സൂപ്പർ താരങ്ങൾ ഇതിൽ ഒത്തു ചേരുന്നത്. വിശാൽ ദഡ്ലാനി, ശേഖർ റവ്ജിയാണി, സഞ്ചിത് ബൽഹാര എന്നിവർ ചേർന്ന് സംഗീതമൊരുക്കിയ പത്താൻ ഹിന്ദി കൂടാതെ, തമിഴ്, തെലുങ്ക് ഭാഷകളിലും കൂടെ ചേർന്ന് പാൻ ഇന്ത്യൻ റിലീസായാണ് എത്തുക.
