കുട്ടികളെ കേന്ദ്ര കഥാപാത്രങ്ങളാക്കി ഒരുക്കിയ മലയാള ചിത്രമായ പ്യാലി ജൂലൈ എട്ടിന് റിലീസ് ചെയ്യാൻ പോവുകയാണ്. അതിന് മുന്നോടിയായി ഇപ്പോൾ ഈ ചിത്രത്തിലെ ഒരു ഗാനം കൂടി പുറത്തു വിട്ടിരിക്കുകയാണ് ഇതിന്റെ അണിയറ പ്രവർത്തകർ. പ്യാലി എന്ന കേന്ദ്ര കഥാപാത്രത്തിന്റെ ലോകം ഇതാണ് എന്നു പറഞ്ഞു കൊണ്ടാണ് ഈ ഗാനം റിലീസ് ചെയ്തിരിക്കുന്നത്. മാൻഡോ സോങ് എന്ന പേരിൽ റിലീസ് ചെയ്തിരിക്കുന്ന ഈ ഗാനം ആലപിച്ചത് അശ്വിൻ ഗോപകുമാർ ആണ്. പ്രീതി പിള്ളൈ വരികൾ രചിച്ചിരിക്കുന്ന ഈ ഗാനത്തിന് ഈണം പകർന്നത് പ്രശാന്ത് പിള്ളയാണ്. ഒരു അനിമേഷൻ വീഡിയോ ആയാണ് ഈ ഗാനം പുറത്ത് വിട്ടിരിക്കുന്നതെന്നതും ശ്രദ്ധേയമാണ്. ഇതിന്റെ നേരത്തെ വന്ന ടൈറ്റിൽ ട്രാക്ക്, ടീസർ, ട്രെയ്‌ലർ, മോഷൻ പോസ്റ്റർ എന്നിവയൊക്കെ വലിയ ശ്രദ്ധ നേടിയെടുത്തിരുന്നു.
ദുൽഖർ സൽമാന്റെ നിർമ്മാണ- വിതരണ ബാനറായ വേഫെറർ ഫിലിംസിന്റെയും അന്തരിച്ചു പോയ നടൻ എൻ എഫ് വർഗീസിന്റെ സ്മരണാർത്ഥമുള്ള എൻ എഫ് വർഗീസ് പിക്ചേഴ്‌സിന്റെയും ബാനറിൽ, ദുൽഖർ സൽമാനും സോഫിയ വർഗീസും ചേർന്ന് നിർമ്മിച്ച ഈ ചിത്രം, ഈ കഴിഞ്ഞ കേരളാ സംസ്ഥാന ചലച്ചിത്ര അവാർഡിൽ കലാസംവിധാനത്തിനും ബാലതാരത്തിനുമുള്ള അവാർഡുകൾ കരസ്ഥമാക്കിയ ചിത്രമാണെന്ന പ്രത്യേകത കൂടിയുണ്ട്. ബാർബി ശർമ്മ, ജോർജ് ജേക്കബ്, ശ്രീനിവാസൻ, മാമുക്കോയ, അപ്പാനി ശരത്, റാഫി, അൽത്താഫ് സലിം, സുജിത് ശങ്കർ, ആടുകളം മുരുഗദോസ് എന്നിവർ പ്രധാന കഥാപാത്രങ്ങളെയവതരിപ്പിക്കുന്ന ഈ ചിത്രം രചിക്കുകയും സംവിധാനം ചെയ്യുകയും ചെയ്തിരിക്കുന്നത് നവാഗതരായ ബബിതയും റിനുവുമാണ്. തെരുവിലെ സഹോദര സ്‌നേഹത്തിന്റെ കഥ പറയുന്ന ഒരു ചിത്രമാണിതെന്ന സൂചനയാണ് ഇതിന്റെ ട്രെയ്‌ലർ നൽകിയത്.
