ദിലീപ് നായകനായ ശ്രദ്ധേയ ചിത്രമായ കമ്മാരസംഭവത്തിനു ശേഷം രതീഷ് അമ്പാട്ട് ഒരുക്കിയ ഏറ്റവും പുതിയ ചിത്രമാണ് തീർപ്പ്. കമ്മാരസംഭവം രചിച്ച മുരളി ഗോപി തന്നെ രചിക്കുകയും ചെയ്തിരിക്കുന്ന ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ ഏതാനും ദിവസങ്ങൾക്കു മുൻപേ പുറത്ത് വരികയും പ്രേക്ഷക ശ്രദ്ധ നേടുകയും ചെയ്തിരുന്നു. ഇപ്പോഴിതാ ഇതിന്റെ ആദ്യ ടീസർ ഇന്ന് റിലീസ് ചെയ്തിരിക്കുകയാണ്. വമ്പൻ പ്രേക്ഷക ശ്രദ്ധയാണ് ഈ ടീസർ നേടിയെടുക്കുന്നത്. പൃഥ്വിരാജ് സുകുമാരൻ, ഇന്ദ്രജിത് സുകുമാരൻ, സൈജു കുറുപ്പ്, വിജയ് ബാബു എന്നിവർ കേന്ദ്ര കഥാപാത്രങ്ങളെ അവതരിപ്പിക്കുന്ന ഈ ചിത്രം ഒരു സൈക്കോളജി ത്രില്ലർ ആണെന്ന സൂചന ലഭിക്കുന്നുണ്ട്. ചരിത്രവും കാലിക പ്രാധാന്യമുള്ള സംഭവങ്ങളുമൊക്കെ കടന്നു വരുന്ന ഈ ചിത്രം മറ്റൊരു വലിയ ബോക്സ് ഓഫിസ് വിജയമാകുമെന്ന പ്രതീക്ഷയിലാണ് പ്രേക്ഷകർ.
സിദ്ദിഖ്, ഇഷാ തൽവർ, ലുക്മാൻ, ഷൈജു ശ്രീധർ, അവറാൻ, ശ്രീകാന്ത് മുരളി, അന്നാ റെജി കോശി എന്നിവരും പ്രധാന വേഷങ്ങളിലെത്തുന്ന ഈ ചിത്രത്തിന് പശ്‌ചാത്തല സംഗീതമൊരുക്കിയത് ഗോപി സുന്ദറാണ്. വ്യത്യസ്ത ഫോർമാറ്റിലാണ് ഈ ചിത്രം ഒരുക്കിയിരിക്കുന്നതെന്നും, ഇന്നത്തെ കാലഘട്ടത്തിലാണ് ഇതിന്റെ കഥ നടക്കുന്നതെങ്കിലും സൗഹൃദം, രാഷ്ട്രീയം, ചരിത്രം എന്നീ വിഷയങ്ങളെക്കുറിച്ചും പ്രതിപാദിക്കുന്ന ഫ്ലാഷ് ബാക്കുകളും ചിത്രത്തിനുണ്ടെന്നും സംവിധായകൻ വെളിപ്പെടുത്തിയിരുന്നു. വിജയ് ബാബു, മുരളി ഗോപി, രതീഷ് അമ്പാട്ട് എന്നിവർ ചേർന്നാണ് ഈ ചിത്രം നിർമ്മിച്ചിരിക്കുന്നത്. ദീപു ജോസഫ് എഡിറ്റ് ചെയ്യുന്ന ഈ ചിത്രത്തിന് ക്യാമറ ചലിപ്പിച്ചിരിക്കുന്നത് കെ എസ് സുനിലാണ്. ഈ ചിത്രത്തിന് ഗാനങ്ങൾ ഒരുക്കിയതും അതിനു വരികൾ രചിച്ചതും മുരളി ഗോപി തന്നെയാണ്.
