മമ്മൂട്ടിയും പാര്‍വതിയും കേന്ദ്രകഥാപാത്രങ്ങളായെത്തുന്ന പുഴു എന്ന ചിത്രം മെയ് പതിമൂന്നിന് റിലീസ് ചെയ്യാൻ പോവുകയാണ്. മമ്മൂട്ടിയുടെ ആദ്യത്തെ നേരിട്ടുള്ള ഒടിടി റിലീസായെത്തുന്ന ഈ ചിത്രം സോണി ലൈവിലാണ് സ്ട്രീം ചെയ്യുക. അതിനു മുൻപേയെത്തിയ ഇതിന്റെ ടീസറും ട്രെയ്‌ലറും മികച്ച പ്രേക്ഷക ശ്രദ്ധ നേടിയിരുന്നു. ഇപ്പോഴിതാ, ഈ ചിത്രത്തിന്റെ ഇരുപതു സെക്കന്റ് ദൈർഘ്യമുള്ള മൂന്നു പ്രോമോ വീഡിയോ കൂടി റിലീസ് ചെയ്തിരിക്കുകയാണ് സോണി ലൈവ് ടീം. പ്രേക്ഷകരെ ആകാംഷയുടെ മുൾമുനയിൽ നിർത്തുന്ന രീതിയിലാണ് ഈ പ്രോമോ വീഡിയോകൾ ഒരുക്കിയിരിക്കുന്നത്. ഇതൊരു ഫാമിലി ത്രില്ലറാണോ സൈക്കോ ത്രില്ലറാണോയെന്ന ആശയകുഴപ്പം പ്രേക്ഷകരിലുണ്ടാക്കുന്ന രീതിയിലാണ് ഈ വീഡിയോകൾ ഒരുക്കിയിരിക്കുന്നത്. ടീസറും ട്രെയ്‌ലറും പല വിധ സൂചനകള്‍ തരുമെന്നും, എന്നാല്‍ പ്രേക്ഷകരെന്തു വിളിക്കുന്നോ അതാണ് പുഴുവെന്നും മമ്മൂട്ടി ഫേസ്ബുക്കില്‍ പങ്കുവെച്ച വീഡിയോയില്‍ പറഞ്ഞിരുന്നു.
പുഴുവിനെ ഒരു ക്രൈം ത്രില്ലറായോ, ഫാമിലി ത്രില്ലറായോ, സൈക്കോ ത്രില്ലറായോ പരിഗണിക്കാമെന്നും മമ്മൂട്ടി പറയുന്നുണ്ട്. ടീസറും ട്രെയ്‌ലറും ക്രൈം ത്രില്ലറെന്ന സൂചനയായിരിക്കും നല്‍കുന്നതെന്നും, എന്നാൽ ഇതൊരു ക്രൈം ത്രില്ലറാണെന്ന് താൻ കരുതുന്നില്ലെന്നും മമ്മൂട്ടി പറഞ്ഞു. നവാഗതയായ റത്തീന സംവിധാനം ചെയ്തിരിക്കുന്ന ഈ ചിത്രം, ഉണ്ട എന്ന ഖാലിദ് റഹ്മാൻ ചിത്രത്തിന് ശേഷം ഹര്‍ഷാദ്, വൈറസ് എന്ന ആഷിക് അബു ചിത്രത്തിന് ശേഷം ഷറഫു-സുഹാസ് കൂട്ടുകെട്ട് എന്നിവർ ചേർന്നാണ് രചിച്ചത്. നെടുമുടി വേണു, ഇന്ദ്രന്‍സ്, മാളവിക മോനോന്‍ തുടങ്ങി നിരവധി പ്രമുഖരായ താരങ്ങളഭിനയിച്ച ഈ ചിത്രത്തിന് കാമറ ചലിപ്പിച്ചത് തേനി ഈശ്വർ, സംഗീതമൊരുക്കിയത് ജേക്സ് ബിജോയ്, എഡിറ്റ് ചെയ്തിരിക്കുന്നത് ദീപു ജോസഫ് എന്നിവരാണ്.
