ഇപ്പോൾ ഗംഭീര പ്രേക്ഷക പ്രതികരണം നേടി തീയേറ്ററുകളിൽ നിറഞ്ഞ സദസ്സിൽ പ്രദർശിപ്പിക്കുന്ന ചിത്രമാണ് മാർജാര ഒരു കല്ല് വെച്ച നുണ. നവാഗതനായ രാകേഷ് ബാല സംവിധാനം ചെയ്ത ഈ ചിത്രം വളരെ പുതുമയാർന്ന, ത്രില്ലിങ്ങായ ഒരു ചലച്ചിത്രാനുഭവം ആണെന്നാണ് പ്രേക്ഷകർ അഭിപ്രായപ്പെടുന്നത്. മിസ്റ്ററി ത്രില്ലർ ആയി ഒരുക്കിയിരിക്കുന്ന ഈ ചിത്രത്തിലെ ഗാനങ്ങളും സൂപ്പർ ഹിറ്റായി മാറി കഴിഞ്ഞു. ഇപ്പോഴിതാ ഈ ചിത്രത്തിലെ മനോഹരമായ ഒരു പ്രണയ ഗാനത്തിന്റെ വീഡിയോ ഇപ്പോൾ റിലീസ് ചെയ്തു കഴിഞ്ഞു. മെല്ലെ ചൊല്ലുകില്ലേ എന്ന വരികളോടെ തുടങ്ങുന്ന ഈ ഗാനം രചിച്ചത് റഫീഖ് അഹമ്മദും പാടിയത് രാകേഷ് കിഷോറും ആണ്. കിരൺ ജോസ് ആണ് ഈ ഗാനത്തിന് ഈണം പകർന്നിരിക്കുന്നത്.
നായകനായ വിഹാൻ, നായികയായ രേണുക എന്നിവരുടെ പ്രണയ രംഗങ്ങൾ ആണ് ഈ ഗാനത്തിലൂടെ ആവിഷ്കരിച്ചിരിക്കുന്നത്. ഇരുവരുടെയും ഓൺസ്‌ക്രീൻ കെമിസ്ട്രിയും അതോടൊപ്പം ജെറി സൈമൺ ഒരുക്കിയ മനോഹരമായ ദൃശ്യങ്ങളും ചേർന്നപ്പോൾ ഈ ഗാനം വലിയ പ്രേക്ഷക ശ്രദ്ധയാണ് നേടുന്നത്. മുല്ലപ്പള്ളി പ്രൊഡക്ഷൻസിന്റെ ബാനറിൽ ചാക്കോ മുല്ലപ്പള്ളി നിർമ്മിച്ച ഈ ചിത്രത്തിന്റെ ട്രൈലെർ റിലീസ് ചെയ്തത് കംപ്ലീറ്റ് ആക്ടർ മോഹൻലാൽ ആയിരുന്നു. ഒരു വലിയ വീടിനെയും ആ വീടിനെ ചുറ്റിപറ്റി ഉള്ള ഒരു വലിയ നുണയേയും അടിസ്ഥാനമാക്കി ആണ് ഈ ചിത്രം മുന്നോട്ടു നീങ്ങുന്നത്. ജെയ്സൺ ചാക്കോ ആണ് ഈ ചിത്രത്തിലെ മറ്റൊരു നായകൻ. അഭിരാമി, അഞ്ജലി, സുധീർ കരമന, രാജേഷ് ശർമ്മ, ബാലാജി ശർമ്മ, ഹരീഷ് പേരാടി, ടിനി ടോം, കൊല്ലം സുധി എന്നിവരും ഈ ചിത്രത്തിൽ മികച്ച പ്രകടനമാണ് കാഴ്ച വെച്ചിരിക്കുന്നത്.
