മോഹൻലാൽ നായകനായ ബിഗ് ബ്രദർ എന്ന ചിത്രം ഈ മാസം പതിനാറിന് വേൾഡ് വൈഡ് റിലീസ് ആയി എത്തുകയാണ്. പ്രശസ്ത സംവിധായകൻ സിദ്ദിഖ് രചനയും സംവിധാനവും നിർവഹിച്ച ഈ ചിത്രത്തിന്റെ നിർമ്മാണ പങ്കാളി കൂടിയാണ് അദ്ദേഹം. ഒരു ഫാമിലി ആക്ഷൻ ഡ്രാമ ആയി ഒരുക്കിയിരിക്കുന്ന ഈ ചിത്രത്തിൽ മോഹൻലാലിനൊപ്പം ഒരു വമ്പൻ താര നിര തന്നെ അണിനിരക്കുന്നുണ്ട്. ഇതിലെ ആദ്യ വീഡിയോ സോങ് കുറച്ചു ദിവസം മുൻപേ റിലീസ് ചെയ്യുകയും സൂപ്പർ ഹിറ്റായി മാറുകയും ചെയ്തിരുന്നു. അമിത് ത്രിവേദി, ഗൗരി ലക്ഷ്മി എന്നിവർ ആലപിച്ച കണ്ടോ കണ്ടോ എന്ന ഈ ഗാനം ഏവരും ഒരേപോലെയാണ് സ്വീകരിച്ചത്. ദീപക് ദേവ് ആണ് ഈ ചിത്രത്തിന് വേണ്ടി സംഗീത സംവിധാനം നിർവഹിച്ചത്.
ഇപ്പോഴിതാ ഈ ചിത്രത്തിലെ ഒരു ദിനം എന്ന പുതിയ ഗാനത്തിന്റെ ലിറിക് വീഡിയോ റിലീസ് ചെയ്തിരിക്കുകയാണ്. റിലീസ് ചെയ്തു മിനിട്ടുകൾക്കകം തന്നെ ഈ ഗാനവും സോഷ്യൽ മീഡിയയിൽ ട്രെൻഡിങ് ആയിരിയ്ക്കുകയാണ്. ആദ്യ ഗാനം പോലെ തന്നെ മനോഹരമായ ഒരു മെലഡി ആയാണ് ദീപക് ദേവ് ഈ പുതിയ ഗാനവും ഒരുക്കിയിരിക്കുന്നത്. വളരെ വ്യത്യസ്തമായ ഒരു ശൈലിയിൽ കംപോസ് ചെയ്തിരിക്കുന്ന ഈ ഗാനത്തിന്റെ വരികളും ആലാപന ശൈലിയും എല്ലാം മനോഹരമായിട്ടുണ്ട് എന്ന് പറയാതെ വയ്യ. ബോളിവുഡ് താരം അര്ബാസ് ഖാൻ, വിഷ്ണു ഉണ്ണികൃഷ്ണൻ, ടിനി ടോം, ഇർഷാദ്, സർജാണോ ഖാലിദ് എന്നിവരും അഭിനയിക്കുന്ന ഈ ചിത്രത്തിലെ നായികമാർ ആയി എത്തുന്നത് മിർണ്ണ മേനോൻ, ഗാഥാ, ഹണി റോസ് എന്നിവർ ആണ്.
