നടിപ്പിൻ നായകൻ സൂര്യ നായക വേഷത്തിൽ എത്തുന്ന പുതിയ തമിഴ് ചിത്രമാണ് സൂററായ് പോട്രൂ. ആമസോൺ പ്രൈമിൽ ഓൺലൈൻ റിലീസായി എത്താൻ ഒരുങ്ങുന്ന ഈ ചിത്രത്തിന്റെ ട്രൈലെർ ഇന്ന് റിലീസ് ചെയ്തു കഴിഞ്ഞു. ആരാധകരേയും സിനിമാ പ്രേമികളെയും ഒരുപോലെ രോമാഞ്ചം കൊള്ളിക്കുന്ന ഒരു ട്രൈലെർ ആണ് ഇന്ന് പുറത്തു വന്നിരിക്കുന്നത് എന്ന് പറയാം. ഒരേ സമയം ക്ലാസും മാസ്സും ആണ് ചിത്രം എന്ന സൂചനയാണ് ഈ ട്രൈലെർ നൽകുന്നത്. സൂര്യ എന്ന നടൻ വിവിധ ഗെറ്റപ്പുകളിൽ ആണ് ഈ ചിത്രത്തിൽ പ്രത്യക്ഷപ്പെടുന്നത്. ഒരു താരം എന്നതിലുപരി ഒരു നടനെന്ന നിലയിൽ സൂര്യയുടെ കരിയറിലെ തന്നെ ഏറ്റവും മികച്ച പ്രകടനങ്ങളിൽ ഒന്നായിരിക്കും ഈ ചിത്രത്തിലേതു എന്ന് അണിയറ പ്രവർത്തകർ തന്നെ നേരത്തെ അവകാശപ്പെട്ടിരുന്നു. ഇതിനു മുൻപ് റിലീസ് ചെയ്ത ഈ ചിത്രത്തിലെ പാട്ടുകളും അതുപോലെ മേക്കിങ് വീഡിയോയും ഏറെ ശ്രദ്ധ നേടിയെടുത്തിരുന്നു. പ്രശസ്ത സംവിധായിക സുധ കൊങ്ങരയാണ് ഈ ചിത്രം ഒരുക്കിയിരിക്കുന്നത്.
എയർ ഡെക്കാൺ ഫൗണ്ടർ ആയ ക്യാപ്റ്റൻ ജി ആർ ഗോപിനാഥിന്റെ ജീവിതത്തെ ആസ്പദമാക്കിയാണ് ഈ ചിത്രം ഒരുക്കിയിരിക്കുന്നത്. സംവിധായിക തന്നെ രചിച്ച ഈ ചിത്രം സൂര്യയുടെ 2 ഡി എന്റർടെയ്ൻമെന്റ്, സിഖീയ എന്റർടെയ്ൻമെന്റ് എന്നീ നിർമാണ കമ്പനികൾ ഒരുമിച്ചാണ് നിർമ്മിച്ചിരിക്കുന്നത്. ബോളിവുഡ് താരം ജാക്കി ഷെറോഫ്, മോഹൻ ബാബു, പരേഷ് റാവൽ, കരുണാസ്, ഉർവശി എന്നിവരും നിർണ്ണായക വേഷങ്ങൾ ചെയ്യുന്ന ഈ ചിത്രത്തിലെ നായികാ വേഷം ചെയ്യുന്നത് മലയാളി താരം അപർണ്ണ ബാലമുരളിയാണ്. ജി വി പ്രകാശ് കുമാർ ആണ് ഈ ചിത്രത്തിന് വേണ്ടി സംഗീതം ഒരുക്കിയിരിക്കുന്നത്.
