തമിഴകത്തിന്റെ ചിയാൻ വിക്രം നായകനായി എത്തുന്ന ഏറ്റവും പുതിയ ചിത്രമായ കോബ്രയുടെ റിലീസ് കാത്തിരിക്കുകയാണിപ്പോൾ ആരാധകർ. ഈ വരുന്ന ഓഗസ്റ്റ് മുപ്പത്തിയൊന്നിനാണ് കോബ്ര റിലീസ് ചെയ്യാൻ പോകുന്നത്. ഇതിനോടകം പുറത്തു വന്ന ഇതിന്റെ ടീസറുകൾ, ഗാനങ്ങളെന്നിവയെല്ലാം പ്രേക്ഷകർ ഇരുകയ്യും നീട്ടി സ്വീകരിച്ചിരുന്നു. ഇപ്പോഴിതാ ഇതിന്റെ കിടിലൻ ട്രൈലെർ പുറത്തു വന്നിരിക്കുകയാണ്. പ്രേക്ഷകരെ ഞെട്ടിക്കാൻ തന്നെയാണ് ഇത്തവണ വിക്രമെത്തുന്നതെന്ന സൂചനയാണ് ഈ ട്രെയ്‌ലറും നമ്മുക്ക് തരുന്നത്. ഒരുപിടി വ്യത്യസ്ത ഗെറ്റപ്പുകളിൽ വിക്രമെത്തുന്ന ഈ ചിത്രം, ഇമൈക നൊടികൾ, ഡിമാൻഡി കോളനി എന്നീ സൂപ്പർഹിറ്റ് സിനിമകൾ സംവിധാനം ചെയ്ത ആർ. അജയ് ജ്ഞാനമുത്തുവാണ് സംവിധാനം ചെയ്തിരിക്കുന്നത്. സംഗീത മാന്ത്രികൻ എ ആർ റഹ്മാൻ ഈണം നൽകിയ ഇതിലെ ഗാനങ്ങളെല്ലാം തന്നെ ഇതിനോടകം സൂപ്പർ ഹിറ്റുകളായി മാറിയിട്ടുണ്ട്. അതിശയിപ്പിക്കുന്ന ദൃശ്യങ്ങളും ആക്ഷനുമാണ് കോബ്രയുടെ ഹൈലൈറ്റെന്നും ഇന്ന് വന്ന ട്രൈലെർ കാണിച്ചു തരുന്നുണ്ട്.
കെ ജി എഫ് സീരിസിലൂടെ ജനപ്രീതി നേടിയ ശ്രീനിധി ഷെട്ടിയാണ് ഈ ചിത്രത്തിലെ നായികാ വേഷത്തിൽ എത്തുന്നത്. സെവൻ സ്ക്രീൻ സ്റ്റുഡിയോയുടെ ബാനറിൽ എസ്.എസ്. ലളിത് കുമാർ നിർമ്മിച്ചിരിക്കുന്ന ഈ ചിത്രത്തിൽ, മുൻ ഇന്ത്യൻ ക്രിക്കറ്റ് താരം ഇർഫാൻ പത്താൻ, മലയാളി താരങ്ങളായ റോഷൻ മാത്യു, സർജാനോ ഖാലിദ്, മിയ, കനിഹ, പദ്മപ്രിയ, മാമുക്കോയ, ബാബു ആൻറ്റണി എന്നിവരും അഭിനയിച്ചിട്ടുണ്ട്. ഇഫാർ മീഡിയായ്ക്ക് വേണ്ടി റാഫി മാതിര ഈ ചിത്രം കേരളത്തിൽ അവതരിപ്പിക്കുമ്പോൾ, ഡ്രീം ബിഗ് ഫിലിംസും, ഇ ഫോർ എൻറ്റർടൈൻമെൻറ്റും ചേർന്ന് കോബ്ര ഇവിടുത്തെ സ്‌ക്രീനുകളിൽ എത്തിക്കും. ഹരീഷ് കണ്ണൻ ദൃശ്യങ്ങളൊരുക്കിയ കോബ്ര എഡിറ്റ് ചെയ്തിരിക്കുന്നത് ഭുവൻ ശ്രീനിവാസനാണ്.
