അയ്യപ്പനും കോശിയും എന്ന പൃഥ്വിരാജ് -ബിജു മേനോൻ ചിത്രത്തിന് വേണ്ടി മാരത്തോൺ മേക് അപ് ഇടുന്ന നരസിംഹ സ്വാമി എന്ന മേക്കപ്പ് മാന്റെ വീഡിയോ കുറച്ചു നാൾ മുൻപ് സോഷ്യൽ മീഡിയയിൽ വൈറലായിരുന്നു. പ്രശസ്ത സംവിധായകൻ സച്ചി രചിച്ചു സംവിധാനം ചെയ്ത ഈ ചിത്രത്തിലെ ഓരോ കഥാപാത്രങ്ങളുടെയും ഗംഭീര മേക് ഓവറിനു പിന്നിൽ നരസിംഹ സ്വാമിയുടെ കരങ്ങളായിരുന്നു. ചിത്രത്തിലെ കേന്ദ്ര കഥാപാത്രങ്ങളായ റിട്ടയേർഡ് ഹവിൽദാർ കോശിയെ അവതരിപ്പിച്ച പൃഥ്വിരാജിനും സബ് ഇൻസ്‌പെക്ടർ അയ്യപ്പൻ നായരെ അവതരിപ്പിച്ച ബിജു മേനോനും മാത്രമല്ല, ചിത്രത്തിലെ ഓരോ ചെറിയ വേഷവും ചെയ്ത നടീനടന്മാർക്കു വേണ്ടിയും മേക് അപ് ചെയ്തത് ഈ മേക്കപ്പ് കലാകാരനാണ്.
രഞ്ജിത്ത്, സാബുമോൻ, അനിൽ നെടുമങ്ങാട്, അനു മോഹൻ, അലൻസിയർ, ഷാജു, അന്നാ രാജൻ, ഗൗരി നന്ദ, ബിജു മേനോൻ, പൃഥ്വിരാജ് തുടങ്ങി എല്ലാവർക്കും മേക്കപ്പിടുന്ന നരംസിംഹ സ്വാമിയുടെ വീഡിയോയാണ് അന്ന് സോഷ്യൽ മീഡിയയുടെ ശ്രദ്ധ നേടിയത് എങ്കിൽ ഇന്ന് ശ്രദ്ധ നേടുന്നത് നരസിംഹ സ്വാമിയും ടീമും ഒരുക്കിയ ഒരു കോമഡി മിനി വെബ് സീരീസാണ്. മണ്ടൻ എന്ന യൂട്യൂബ് ചാനലിലൂടെ പുറത്തു വരുന്ന ഈ മിനി വെബ് സീരിസിന്റെ ആദ്യത്തെ മൂന്നു എപ്പിസോഡുകൾ ഇപ്പോൾ തന്നെ റിലീസ് ചെയ്തു കഴിഞ്ഞു. തള്ള് ബിജു, പള്ളിയിലച്ചന്റെ ടൈറ്റാനിക് എന്നിവക്ക് ശേഷം പുറത്തു വന്ന ഇതിലെ മൂന്നാമത്തെ എപ്പിസോഡാണ് കാളാമുണ്ടം. ഹരിദാസ് കോട്ടയം, അഭി ബർണബാസ്‌, സ്വാതി കിരൺ എന്നിവർ അഭിനയിച്ച ഈ മൂന്നാം എപ്പിസോഡിനും മികച്ച പ്രേക്ഷക പ്രശംസയാണ് ലഭിക്കുന്നത്. ഇനി പുറത്തിറങ്ങാൻ ഇരിക്കുന്നത് ബോധപ്പുട്ട് എന്ന എപ്പിസോഡാണ്.
