മലയാളത്തിന്റെ യുവ താരം ദുൽഖർ സൽമാൻ നായകനായി എത്തുന്ന ഏറ്റവും പുതിയ തെലുങ്ക് ചിത്രമാണ് സീതാ രാമം. മലയാളം, തമിഴ് ഭാഷകളിലും മൊഴിമാറ്റിയെത്തുന്ന ഈ ചിത്രം ഏറെ പ്രതീക്ഷയോടെയാണ് ദുൽഖർ സൽമാൻ ആരാധകർ കാത്തിരിക്കുന്നത്. കീർത്തി സുരേഷ് നായികാ വേഷം ചെയ്ത മഹാനടിക്കു ശേഷം ദുൽകർ സൽമാൻ വേഷമിട്ട ചിത്രമാണ് സീതാ രാമം. ഈ ചിത്രത്തിന്റെ പോസ്റ്ററുകൾ, പ്രൊമോ വീഡിയോ, ടീസർ എന്നിവയെല്ലാം മികച്ച പ്രേക്ഷക ശ്രദ്ധ നേടിയിരുന്നു. അതുപോലെ തന്നെ പെണ്പൂവേ തേൻവണ്ടേ എന്ന് തുടങ്ങുന്ന ഇതിലെ ഒരു ഗാനവും സൂപ്പർ ഹിറ്റായി മാറി. ശരത്, നിത്യ മാമൻ എന്നിവരാണ് ഈ ഗാനം മലയാളത്തിലാലപിച്ചത്. ഇപ്പോഴിതാ ഇതിലെ പുത്തൻ ഗാനം റിലീസ് ചെയ്തിരിക്കുകയാണ്. ആരോമൽ പൂവ് പോലെന്നെ എന്ന വരികളോടെ തുടങ്ങുന്ന ഈ ഗാനത്തിന്റെ ലിറിക്കൽ വീഡിയോയാണ് പുറത്തു വന്നിരിക്കുന്നത്.
വിനായക് ശശികുമാർ വരികൾ രചിച്ചിരിക്കുന്നു ഈ ഗാനം മലയാളത്തിൽ ആലപിച്ചിരിക്കുന്നത് സൂരജ് സന്തോഷാണ്. വിശാൽ ചന്ദ്രശേഖറാണ് ഈ ചിത്രത്തിന് സംഗീത സംവിധാനം നിർവഹിച്ചിരിക്കുന്നത്‌. ദുൽകർ സൽമാൻ അവതരിപ്പിക്കുന്ന ലെഫ്റ്റനന്റ് റാമിന്റെ പ്രണയകഥ പറയുന്ന ഈ ചിത്രത്തിൽ മൃണാൾ താക്കൂറാണ് നായികാ വേഷം ചെയ്തിരിക്കുന്നത്. ഹനു രാഘവപുടി സംവിധാനം ചെയ്യുന്ന ഈ ചിത്രം നിർമ്മിക്കുന്നത് സ്വപ്ന സിനിമ, വൈജയന്തി മൂവീസ് എന്നിവർ ചേർന്നാണ്. തെലുങ്കിലെ സൂപ്പർ നായികയായ രശ്മിക മന്ദാനയും നിർണ്ണായക വേഷം ചെയ്യുന്ന ഈ ചിത്രത്തിന് ക്യാമറ ചലിപ്പിച്ചത് പി എസ് വിനോദ്, ഇത് എഡിറ്റ് ചെയ്യുന്നത് കോട്ടഗിരി വെങ്കിടേശ്വര റാവു എന്നിവരാണ്. വരുന്ന ആഗസ്ത് മാസം പതിനഞ്ചിനാണ്‌ സീതാ രാമം റിലീസ് ചെയ്യാൻ പോകുന്നത്.
