കഴിഞ്ഞ ദിവസമാണ് മലയാള നടീനടന്മാരുടെ സംഘടന ആയ അമ്മയുടെ ഇരുപത്തിയഞ്ചാമതു ജനറൽ ബോഡി മീറ്റിങ് നടന്നത്. മോഹൻലാലും മമ്മൂട്ടിയും അടക്കമുള്ള എല്ലാ പ്രമുഖ താരങ്ങളും പങ്കെടുത്ത മീറ്റിങ്ങിൽ അമ്മയുടെ അംഗങ്ങളും ഡബ്ള്യു സി സി പ്രവർത്തകരുമായി പാർവതി, രേവതി തുടങ്ങിയവരും പങ്കെടുത്തു. അന്തരിച്ചു പോയ തിലകൻ ചേട്ടൻ എന്നും അമ്മയുടെ ഭാഗം തന്നെയാണ് എന്ന് ആവർത്തിച്ചു വ്യക്തമാക്കിയ ‘അമ്മ അദ്ദേഹത്തിന്റെ സംഭാവനകളെ ആദരിക്കുകയും ചെയ്യുന്നുവെന്നും വ്യക്തമാക്കി. അമ്മയുടെ ബൈലോയിലെ പുതിയ ഭേദഗതികളും ഇന്നലത്തെ ചർച്ചയിൽ വന്നു എങ്കിലും ഡബ്ള്യു സി സി പ്രവർത്തകർ അടക്കമുള്ളവരുടെ അഭിപ്രായങ്ങളും പരിഗണിച്ചു അത് കൂടുതൽ മെച്ചപ്പെടുത്താനും അതിനു വേണ്ടി എല്ലാ അംഗങ്ങളുടെയും അഭിപ്രായം ശേഖരിക്കാനും ‘അമ്മ തീരുമാനിച്ചു.
അതിനു ശേഷം നടന്ന പത്ര സമ്മേളനത്തിൽ ഡബ്ള്യു സി സി യിൽ ഉള്ള നടിമാരെ അമ്മയിലെ അംഗങ്ങൾ ചെയ്യുന്ന സിനിമകളിൽ നിന്ന് ഒഴിവാക്കുന്നു എന്ന പരാതിയെ കുറിച്ച് പത്രക്കാർ സൂചിപ്പിചപ്പോൾ ‘അമ്മ പ്രസിഡന്റ് മോഹൻലാൽ പറഞ്ഞ മറുപടി ഇപ്പോൾ ഏറെ ശ്രദ്ധ നേടുകയാണ്. പാർവതി അടക്കമുള്ള നടിമാരെ തങ്ങൾ അഭിനയിക്കുന്ന ചിത്രങ്ങളിലേക്ക് ക്ഷണിക്കാറുണ്ട് എന്നും എന്നാൽ അവർക്കു വരാൻ താല്പര്യം ഇല്ല എന്നാണ് പറയുന്നത് എന്നും മോഹൻലാൽ പറഞ്ഞു. തങ്ങൾ അവരെ മനപ്പൂർവം ഒഴിവാക്കുന്നത് അല്ല എന്നും അവർക്കു സഹകരിക്കാൻ താല്പര്യം ഇല്ലാതെ മാറി നിൽക്കുന്നത് ആണെന്നും അദ്ദേഹം പറഞ്ഞു. അത് എന്ത് കൊണ്ടെന്നു അവരോടു തന്നെ ചോദിക്കണം എന്നും അദ്ദേഹം പറഞ്ഞു. അമ്മയിൽ നിന്ന് രാജി വെച്ച് പോയ അംഗങ്ങൾക്ക് അപേക്ഷ സമർപ്പിച്ചു കൃത്യമായ നടപടി ക്രമങ്ങളിലൂടെ അമ്മയിലേക്കു തിരിച്ചു വരാൻ ഉള്ള എല്ലാ സ്വാതന്ത്ര്യവും ഉണ്ടെന്നും ‘അമ്മ ഭാരവാഹികൾ അറിയിച്ചു.
